「七十二行，行行出狀元」，呢個係以前嘅講法，到咗今時今日咯喎，社會分工愈來愈細，行業愈來愈多，七十二行已經係小兒科喇。嗱，有種新興行業叫做「跑腿」，大家聽過未？
顧名思義，所謂跑腿，即係收錢代辦事咁解，例如代排隊、代報名、代購物、代送花、代收數等等，幾乎無所不能代。由於需求愈來愈大，跑腿公司喺內地開到成行成市，紅紅火火，最近甚至殺入本港，為雙非或跨境家長提供一條龍服務，除咗協助佢哋領取幼稚園入學申請表，仲包辦雙非兒童嘅旅遊證件，例如排隊輪籌、陪辦證及代領證件等。受人錢財，替人跑腿，大家終於知道點解幼稚園派表次次都有咁多人排隊，原來排隊嘅人多數係跑腿咋。
呢，只要喺網上搜尋「香港跑腿」等字眼，就會出現十幾間提供跑腿服務嘅網店，大部分主打雙非或跨境兒童辦證服務，收費由三百至五百元不等，如果客人唔識申請程序，只要畀多一百元，跑腿仲可以陪同申請證件添。除此之外，跑腿公司仲可以代買奶粉、化妝品等等，只有諗唔到，沒有做唔到，唔怪得其門如市，生意滔滔喇。
本來呢，有需求就有市場，跑腿公司應運而生，一啲都唔出奇，弊在呢啲跑腿十居其九都係內地人，咁就有好大問題喇。咩問題？一來，內地人持雙程證或個人遊等旅遊證件來港，唔可以從事任何工作圖利，收錢做跑腿，明顯違反逗留條件，隨時監都有得坐吖；二來，跑腿代人排隊，生人霸死地，引起恐慌情緒，搞到幼稚園派表七國咁亂，本地家長怨聲載道；三來咯喎，客人嘅證件等重要個人資料畀跑腿一覽無遺，衍生洩密危機，後果可大可小。
正如學者話齋，如果個人資料被不法分子取得，輕則出賣你嘅私隱，重則攞嚟造假證、開銀行戶口甚至洗黑錢。所以話，雖然有錢使得鬼推磨，花錢買時間及方便本來無可厚非，但光顧跑腿公司之前，千祈要諗清諗楚，否則，萬一惹禍上身，咁就後悔莫及o架喇。
講開又講吖，香港人口唔多，市場唔大，唔似得內地咁多商機，對跑腿公司本來冇乜吸引力，依家之所以愈來愈多人跨境搵食，都係因為雙非兒童咋。小數怕長計，○三年至今，內地婦女喺香港產下嬰兒超過二十八萬名，當中約二十萬名係雙非兒童，呢批雙非家長為咗部署子女來港讀書，申請回港證、回鄉證、入學等都要搵人幫手，咁咪帶挈咗跑腿公司囉。事實再次證明，前朝貪曾政府對內地孕婦中門大開，搞到雙非問題沒完沒了，亂象無日無之，真係累人累物！