如果你係商業奇才，計劃為旗下產品賣廣告，你會去邊度實施你嘅宣傳策略呢？好易選擇啫，《東方日報》連續三十七年高踞全港銷量第一位置，《太陽報》自從創刊以來一直穩佔強勢第三位，絕對係商業奇才登廣告嘅上佳選擇。嗱，功夫茶手頭有一份新鮮滾熱辣嘅最新調查報告，不妨同大家再分享一下當中嘅數據以及理據。
簡單咁講，《東方日報》讀者最多，遠遠拋離《蘋果日報》，若然雙劍合璧加埋《太陽報》，贏爛果報嘅距離簡直係九條街。至於具體數字咯喎，根據調查公司Oracle Added Value嘅報告，《東方》讀者超過三百七十六萬人，《太陽》有一百七十萬零四千人，加埋就係超過五百四十七萬人。其中《東方》讀者人數上升近三萬六千人，《太陽》上升近七萬人，兩報讀者比起前年多咗十萬人。
呢一組數字說明咗乜嘢呢？即係咁，扣除讀者重疊部分，東方報業集團兩報讀者佔全港人口比例百分之五十八，廣告效力毫無疑問威力驚人，必定能夠將廣告嘅資訊發放到每一個角落，宣傳產品嘅能見度直情可以媲美旭日東升！
反觀爛果報，讀者人數跌咗一萬六千四百幾人，此消彼長之下，東方兩報讀者比對方多三百萬人，亦即多百分之一百二十七。廣告客戶梗係精打細算o架啦，一望就知應該幫襯邊個。大家要注意一點喎，Oracle Added Value擁有無可匹敵嘅江湖地位，位列市場調查公司第一位，全球十四個國家設有分公司，調查數據嘅權威性無可置疑。
好嘞，講完讀者人數，不妨再研究一下讀者質素及背景。根據市場研究公司Ipsos調查所得，東方兩報讀者之中，百分之三十在職人士係僱主、行政人員、經理或者專業人士，平均家庭月入三萬六千元，三成擁有大學程度或以上。換句說話嚟講，東方兩報讀者質素極高，職位高過平均人口比例，收入高過平均人口比例，學歷高過平均人口比例。講起Ipsos，同樣來頭不小，Ipsos前身為Synovate，係全港市場調查公司第二位，唔少廣告公司及大型客戶都採用佢哋嘅調查數據，絕對可靠。
唔好怪功夫茶賣花讚花香，如果自己所賣嘅花確係香噴噴，點解唔讚呢？更何況，客觀數字代表鐵一般嘅事實，東方兩報合共超過五百萬嘅讀者人數係冇得吹牛o架，一切有調查數據為證。
順帶一提吖，東方網站一樣大受歡迎，百分之五十三讀者曾經瀏覽on.cc，讀者質素非常高，百分之八十一月入多於三萬元，百分之六十九係大學程度，百分之六十係三十歲以下人士。如果你同時喺on.cc落廣告，絕對係高效益之選！