今時今日睇新聞，經常有一種熟口熟面嘅感覺，事關情節幾乎一模一樣，簡直同舊聞冇乜分別。就以前日發生嘅一宗墮樓命案為例，相信好多香港人腦海裏面都有似曾相識嘅印象。
件事係咁嘅，牛頭角樂華北邨欣華樓一個三百幾呎單位，住咗一家八口，擠迫情況比起一般嘅劏房更加悽慘。慘上加慘嘅係，今年四月先至以單程證來港同家人團聚嘅二十六歲年輕媽媽，懷疑探身窗外晾衫嘅時候失去平衡，非常不幸地喺佢三歲兒子面前跌咗落街，當場不治。
呢單熟口熟面嘅慘劇重點係乜呢？如果功夫茶話畀大家聽，事發單位所用嘅晾衫架仍然係舊式設計嘅「三支香」，各位必然恍然大悟，哦，原來又係房屋署官僚草菅人命！
冇錯喇，睇新聞好似睇舊聞，原因正正就係公屋嘅三支香晾衫架不知害死過幾多人，五十年來造成數之不盡嘅墮樓命案。你知啦，呢一種蠢到冇朋友嘅晾衫方式危機四伏，必須使出九牛二虎之力，體質比較虛弱嘅婦孺人家一個唔覺意就會淪為空中飛人。假如官老爺尚有半點惻隱之心，早就應該將三支香嘅晾衫設計掃入歷史垃圾堆喇。
問題係房署官僚麻木不仁，只係喺○四年撥款二千六百萬元，以每個資助二百元嘅方式，由公屋住戶自行決定是否加錢更換三支香晾衫架，改裝較為安全嘅拉輪式或其他晾衫設計，同時必須自行承擔維修保養事項及責任。
今次出事嘅係一家八口擠迫戶，就係懷疑因為畀唔起錢更換三支香晾衫架而搞出人命，家陣連籌措殮葬費都有困難。有見及此，太陽報愛心基金從「無力殮葬」專戶撥款，直接向殯儀公司支付死者嘅殮葬費用，協助家人處理後事。
立法會房屋事務委員會主席王國興就講得啱嘞，三支香晾衫架對長者及病弱住戶好危險，房署應為所有住戶更換，並且承擔責任，既然設計本身有漏洞，房署有責任主動補救，而唔係單靠住戶自願更換。王國興將於立法會提出動議，要求房署盡快免費更換呢一類危險晾衫架。
計功夫茶話齋，其實唔止三支香嘅危險晾衫陷阱有必要更換，房署啲麻木官僚都有必要換一換。喂，你哋明知五十年來不知幾多人因為晾衫而跌死，咁都唔去強制性亡羊補牢，呢一種毫無惻隱之心嘅所謂公僕，唔只麻木不仁，簡直草菅人命，唔換走根本就係浪費公帑啦！