不是雷射槍失準 只因權貴財氣粗

點解警方突然神勇捉快車？咁就要由一單陳年舊事講起嘞。話說六年前，商人林建岳因為涉嫌超速駕駛面臨停牌，佢重金聘請大狀團，以龐大財力挑戰雷射槍嘅準繩度，結果喺大狀嘅質疑之下，加上警方自己論論盡盡，連番出錯，結果控罪由超速六十四公里大幅削減至超速二十九公里，只判罰款四百五十元及扣分。好明顯，呢單超速案影響相當惡劣，唔只搞到雷射槍嘅準繩度備受質疑，警方執法公信力亦嚴重受損，當時仲掀起一輪集體訴訟潮添，警方短短三個月就收到四百宗要求覆查超速個案，簡直手忙腳亂。

所以咯喎，唔知係咪為咗一雪前恥，警方最近測試發現雷射槍準繩度唔只冇問題，仲不斷提高添，於是發出內部通告，將超速車輛誤差扣減里數縮減，又派特遣隊連番出勤，力撐雷射槍偵速稱職。正所謂，沙塵滾滾，殺錯良民，警方加強打擊超速駕駛，駕駛人士隨時中招，你話係咪權貴甩難，市民有難吖。

冇計喇，有錢能使鬼推磨吖嘛，富豪權貴有錢請大狀，大罪變小罪，小罪變無罪，你唔恨得咁多嘅喇。所以話，所謂法律面前人人平等，純屬吹水嘅咋，千祈唔好當真呀。喺香港，法律主要係為權貴服務，同一支雷射槍之下，唔同駕駛者有唔同待遇，咁叫公平公正咩？咁叫人人平等咩？最離譜嘅係，小市民因為貪一蚊幾毫又拉又鎖，又告又罰，而前特首曾蔭權爵士貪腐成癖無法無天，居然逍遙法外，見到呢幅景象，唔使搵雷射槍偵速，都知法律向權貴極速傾斜啦。

唔怪得有人話，喺香港有錢真係高人一等o架。好似林建岳咁，唔只可以聘請大狀質疑雷射槍準繩度，佢旗下公司仲可以無視「緩拆令」，深夜拆毀粵劇名伶薛覺先故居嘅廣州歷史建築群添。仲有吖，佢身為旅發局主席，旗下公司居然可以「中標」海洋公園酒店項目，明顯涉及利益衝突喇，問你服未！

講到底，不是雷射槍失準，只因權貴財氣粗。有人是非纏身，唔知會唔會又飆車減壓呢？不過飆車還飆車，小心睇路呀，萬一又畀雷射槍捉到正，今次就冇咁好彩喇，隨時吟詩都吟唔甩！