事實再次證明，無恥者最無敵，要享受高薪厚祿，你就要學識厚顏，臉皮愈厚愈能夠令你飛黃騰達，總統都有得你做呀！
呢嗱嗱嗱，就睇菲律賓總統阿基諾三世吖，三年前發生馬尼拉槍手屠殺香港遊客事件，佢已經陰陰笑縮骨卸膊，三年後特區政府就事件向佢追討責任，呢一個賴皮總統繼續以輕佻到極嘅嘴臉拒絕道歉。你話嘞，位高權重嘅國家元首點可以咁厚顏無恥？
成件事係咁嘅，出席印尼峇里島亞太經合組織（APEC）領導人峰會嘅行政長官梁振英，同阿基諾三世會面商討馬尼拉殺人事件。賓賓總統話喎，按照菲律賓文化，總統唔會代他人嘅過錯道歉，否則就等於係國家同政府嘅錯，強調慘劇由槍手一個人造成，總統大老爺只係重申對事件表示深切哀悼同遺憾。
對於香港記者追問人質事件嘅時候被趕走並且沒收採訪證，三世祖就話嘞，認同印尼當局嘅處理手法，記者咁樣追問係有違常規嘅，如果情況發生喺菲律賓，佢哋一樣會咁做。
講到呢度，大家係咪嬲到眼火爆呢？冇錯，呢個世界能夠一次過激嬲七百萬香港人嘅無恥之徒唔算太多，偏偏呢一位賓賓總統係其中一個。功夫茶有少少替令壽堂阿基諾夫人感到無辜，你知港式粗口好多時候沙塵滾滾殺錯良民o架啦，阿仔犯眾憎往往要由阿媽受苦受難。
講番菲律賓文化呢家嘢，殉職領隊謝廷駿嘅哥哥謝志堅就講得啱嘞，事實擺在眼前，菲律賓司法部嘅報告以及香港死因庭嘅裁決，都指出菲方官員失職，批評阿基諾三世嘅講法係不負責任。菲方失職最丟人現眼嘅佼佼者，肯定非「特蠢部隊」莫屬啦，出動嘅時候笨手笨腳，救人變咗害人。特蠢部隊英文簡稱SWAT，全稱其實係Sorry We Aren't Trained。喂，一支足球隊輸波，領隊都要執包袱啦，一支特蠢部隊害到香港遊客死傷枕藉，政府同官員居然可以置身事外，三世祖呢一種打死都唔肯道歉嘅無恥功架真係出神入化咯！
之不過話分兩頭，賴皮總統之所以能夠順利卸膊，都要無能嘅特區政府配合先至可以成事。大家睇下台灣吖，菲律賓海警開槍射殺台灣漁民，台灣政府即時進行制裁，三扒兩撥就迫使三世祖認錯兼賠償。同一個賴皮總統，點解會有截然不同嘅態度呢？原因咪就係特區政府無能為力，而中央政府又袖手旁觀囉。
無能特區政府遇上無恥賓賓總統，點先至可以成功維權呢？功夫茶呼籲京老爺出手，否則連國家名譽都掃地呀！