香港人嘅日常生活之中，最普遍嘅現象係乜嘢呢？功夫茶可以用一個字概括晒，一字記之曰「等」。
人有四苦，生老病死，呢四苦對於香港人而言，簡直係苦上加苦。出生要輪候產房，老來要輪候院舍，患病要輪候醫生，唔好彩大吉利是兩腳一伸等到死，仍然要再等一等，事關骨灰龕位長期供不應求。
申請公屋要排隊，家陣連讀幼稚園亦要排隊，等等等等等等等，特區政府嘅管治模式就係令到普羅大眾等到頸都長。唔信咩？大家再睇下另外兩個例子吖，青衣居民要等最少十七年先至有一座體育館，元朗居民要等十年先至有一座圖書館。癡癡地等已經令人十分難忍，更加傷腦筋嘅係苦等期間物價飆升，淨係青衣體育館嘅工程預算就勁升三倍，超支五億元公帑呀，問你怕未！
學似膾炙人口嘅電視劇話齋，人生有幾多個十年？偏偏港產官僚回歸以來蹉跎歲月，唔係死拖爛拖，就係坐食山崩，尤其係前朝特首曾蔭權打骰期間，衙門辦事效率奇低，低過艷星露出事業線嘅低胸裝，結果造成百廢未舉嘅殘局。
根據一一年修訂嘅《香港規劃標準與準則》，每二十萬人口應該獲得提供一間分區圖書館，四十萬人口就要有一間主要圖書館。元朗區人口預測喺一六年會增加至六十三萬人，現時元朗公共圖書館只有面積一千五百四十平方米，遠遠低於二千九百平方米嘅分區圖書館標準。元朗理論上應該有八間體育館至啱數，但實際上僅得四間咋。
曾蔭權未因為醜聞曝光而變成臭名遠播嘅貪曾之前，○五年施政報告講過，元朗第三區興建新嘅公共圖書館以及體育館。問題係當時嘅貪曾應該已經貪威識食，建館進度唔慢過蝸牛至奇，工程一拖再拖三拖四拖，元朗居民要等到一五年年底先至有機會享用相關設施。
至於葵青區咯喎，人口已經突破五十萬，根據規劃標準，應該要多一座體育館。康文署早於○○年接手青衣涌美路體育館興建計劃，一年過去又一年，三年三年再三年，家陣預計一七年先至完工呀。春去秋來十七年，小朋友由小學開始畀心機讀書，足夠讀到大學畢業啦，你話特區政府係咪烏龜託世吖？工程龜速嘅後果無可避免係成本上漲，造價由○六年嘅一億六千萬元，暴增至六億五千萬元，你話唔係浪費公帑都唔得。
社區設施等呀等，隨時超出人類忍耐力範圍以外。既然貪曾時代已經壽終正寢，現屆政府好心就加把勁收拾爛攤子，你知啦，當苦苦等待嘅老百姓忍無可忍嘅時候，管治權威話唔定會掃地o架！