前朝貪曾造孽 為人父母遭殃

樹當然可以種啦，其實禍都可以種o架，前人假如種下禍根，後人就會蒙受其害。所以咯喎，若然大家覺得此時此刻嘅生活環境苦不堪言，好大可能係前人造孽嘅惡果。

近期最叫苦連天嘅一群，如無意外係爭崩頭為子女報讀幼稚園嘅家長，有人不惜排隊苦等四日四夜，甚至壯烈犧牲辭去月薪三萬元嘅工作，目的都係專心投入瞓街行列，避免心肝寶貝「輸在起跑線」咋。情況之所以搞到咁悽風慘雨，起因咪又係前朝政府種下禍根囉，過氣特首曾蔭權爵士未執包袱滾落台之前，盲目推動醫療同教育產業，不過冇做好人口政策配套措施，結果係雙非家長同本地爸媽爭個你死我活，烽火連連嘅角力戰場包括接生嘅醫院產房、賣奶粉嘅藥房以及讀書識字嘅幼稚園。

「東方報業民意調查」顯示，受訪者將雙非問題歸咎於貪曾，三成六認為前朝政府人口政策失敗，禍延下一代；三成一批評曾蔭權好大喜功推動畸形產業；兩成九覺得佢無視現實，錯判香港承受能力。受訪者亦不滿曾蔭權政府視雙非兒童為人口生力軍，但配套安排欠奉，四成二認為政策錯誤埋下禍根；兩成九直斥貪曾係中港矛盾嘅始作俑者；兩成四覺得補救措施錯漏百出。

何謂補救措施呢？即係咁，眼見幼稚園門外打晒蛇餅，教育局局長吳克儉後知後覺推出補鑊方案，幼稚園優先取錄嘅係本區學童，然後係本地跨區學童，最後先至係跨境學童。不過你知啦，雙非家長腦筋好靈活o架，你有張良計，我有過牆梯，綽號「唔得掂」嘅局長大人一推出補鑊方案，雙非家長唔係走去北區置業，就係租住套房或者劏房，甚至有人出動假地址，務求為子女得到本區學童嘅尊貴身份。

上述調查又顯示，對於北區幼稚園出現通宵排隊人龍，四成三受訪者認為後知後覺嘅政府冇提供足夠資訊；兩成七覺得學界已經束手無策；兩成五批評教育局錯估形勢。至於吳克儉聲稱全香港有足夠嘅幼稚園學額，四成受訪者覺得係數字遊戲誤導家長；三成一直斥吳局長涼薄，輕視北區學額緊張問題；兩成五老實不客氣話佢自欺欺人。

其實計功夫茶話齋，唔止本地爸媽係受害者，雙非家長一樣咁難受。試想想，人哋明明係合法來港產子，到頭來有可能被幼稚園摒諸門外，呢一條數點計先？所以話啫，前朝貪曾造孽，遭殃嘅係所有為人父母者！