睇電視會學壞，睇電影會學壞，玩電子遊戲會唔會學壞呢？不如參考兩個例子吖。第一個例子發生於香港，今年初連續出現兩宗駭人聽聞嘅弒親案，疑兇都係沉迷於血腥格鬥遊戲嘅死忠粉絲。第二個例子發生於美國，一名二十歲青年喺停車場偷走貨車，並且綁架一名女子，期間撞向九架汽車，被捕之後聲稱犯罪嘅動機係為咗體驗「真正嘅GTA」。
GTA係乜東東？即係目前人氣爆燈嘅電子遊戲Grand Theft Auto咁解，最新一款嘅中文名稱係《俠盜獵車手5》。遊戲內容血腥暴力，玩家扮演嘅角色係城市罪犯，但求上位不擇手段，打劫銀行有之，搗亂城市有之，毒品交易都有之。遊戲角色無惡不作，大街大巷任意殺戮，充斥大量恐怖情節。
好嘞，講完恐怖例子，功夫茶同大家研究一個問題，若然一套電影內容血腥暴力，係咪應該送檢，然後給予評級，再加予限制呢？假如電影情節血腥暴力到教壞細路，當然應該列作三級啦，十八歲以下人士不准入場觀看。之但係好可惜，香港法例竟然未有規定電子遊戲發布之前必須送檢，電子遊戲無論點樣荼毒青少年都係零監管，問你服未！
大家睇下外國吖，引起爭議嘅《GTA 5》喺美國及加拿大嘅娛樂軟體分級委員會（ESRB）評為Ｍ類，只准售予十七歲以上人士；英國電影分級委員會（BBFC）定為只准十八歲以上人士購買；澳洲分類委員會（ACB）評為「十八禁」。
喂喂喂，香港既然有《淫褻及不雅物品管制條例》，又有一個電影、報刊及物品管理辦事處，點解唔將電子遊戲納入監管範圍之內呢？正如立法會議員王國興話齋，政府遲遲未有立法要求電子遊戲送檢評級，顯示法例落後，當局有必要檢討並且修改法例，仲要嚴謹執法巡查檢控。
計功夫茶話齋，官老爺經常選擇性檢控，借頭借路扼殺言論自由，絕對唔係空口講白話嘅無理指控。試想想，當年《東快訊》只不過刊登一張大衞像照片之嘛，竟然被列作不雅，反而依家《俠盜獵車手5》之類嘅電子遊戲擺明車馬教壞細路，居然連送檢都唔使，你話相關官僚係咪別有用心吖？係咪本末倒置吖？
點都好啦，香港社會已經夠亂、夠暴力嘅喇，教壞細路嘅電子遊戲係要管o架，除非港產官僚想弒親案無日無之！