渡海濠情：孤寒男友走夾唔唞
韓國有個調查，話女生最討厭男生約會時孤寒，因為拍拖初期都唔肯花錢，證明一啲都唔尊重女性，而嚟自凱旋桑拿嘅小如就十分認同，佢話啱啱拍拖連戲都唔睇，扒都唔鋸一次，呢啲男生送畀你都唔好要！
參觀豪宅
小如話：「我識嘅男朋友，大多數都唔係富二代，所以手頭一啲都唔鬆動，但每次出街，佢哋都好肯花錢喺我身上，例如截的士送我返屋企，但自己就走去逼巴士，唯一例外就係我個前男友，佢係富二代，我同佢第一次約會，竟然約我上佢屋企，見係豪宅咪去見識吓囉！上到去問佢有乜節目，佢話想唔想睇戲，我點點頭，佢打開電視，撳着個電影頻道，竟然話你喜歡睇乜都有，我即時乜嘢興趣都冇晒，但當時都忍住！」
標個尾會
跟住又點呀？小如續道：「睇咗一套戲之後，我就話悶，佢就開部電腦遊戲畀我玩，仲話有幾百款遊戲，一定有一款啱我，仲一邊玩一邊介紹，我真係頂唔順，我話肚餓，佢就打開雪櫃話有好多微波爐食物，只要一叮就食得，我真係火都嚟埋，即時轉頭就走。」佢係有錢仔，送禮一定大手筆？小如話：「我都係咁諗，所以同佢拖拖拉拉希望捱到聖誕節同情人節，收番兩份大禮就當標個尾會，點知兩份都係佢嘅DIY小禮物，咁嘅男人真係畀都唔好要！」
小如Profile
年齡：22歲
三圍：35-24-35
撰文：小德
攝影：阿生