車廂，無論係港鐵車廂，抑或係巴士車廂，實在係充滿火藥味嘅另類戰場。大家應該記得紅極一時嘅「巴士阿叔」，你有壓力，我有壓力，大家都有壓力嘅情況之下破口大罵，鬧到街知巷聞，幾乎憑呢一種人氣令到佢有資格參選特首。
港鐵車廂同巴士車廂點解會觸發咁多口舌之爭嘅呢？原因好簡單，空間太少，乘客太多，有時擠迫到手臂貼手臂，甚至屁股撞屁股，存心博懵嘅色狼就話如魚得水啫，全無變態歪念嘅正常人當然覺得唔舒服啦，一旦覺得退無可退嘅私人空間受到侵犯，無名火起三千丈嘅後果往往係火星撞地球，撞到粗口橫飛有之，撞到拳來腳往亦有之。
車廂作為另類戰場，爭奪座位同樣係觸發衝突嘅導火線之一。你知啦，人類始終係一種自私基因凌駕於善良細胞嘅兩足動物，見到有座位空出咯喎，自自然然就會屁股主宰大腦，一屁股霸佔可能尚有其他乘客臀部餘溫嘅座位。萬一屁股爭霸戰遇上勢均力敵嘅另一個屁股，少不免又係另一番舌劍唇槍以至於肢體摩擦。
好嘞，港鐵公司雖然年年賺錢年年加價，自私基因嘅激情澎湃幾乎無人能及，不過仍然叫做良心未泯，所以打從二○○九年開始喺車廂設立優先座，目的係提高乘客讓座嘅公民意識。舉個例吖，假如你係四肢健全嘅年輕人或者中年人，平時係可以安心享用優先座嘅，不過一見到行動不便嘅老人家，或者身懷六甲嘅大肚婆，你就應該將自己嘅善良細胞盡情釋放，兩足動物變成兩足站立，將座位讓畀更加需要坐一坐嘅對方。
好嘞，港鐵優先座設立咗四年，讓座風氣有冇盛行呢？講起確係丟臉到極，香港人一方面恥笑強國人舉止騎呢，唔係隨處便溺就係當街亂踎，其實自己嘅所作所為唔見得文明幾多。本地同胞搭港鐵嘅時候，見到老人家會扮盲，見到大肚婆會扮忙。功夫茶其中一位女性朋友腹大便便嘅時候，親身經歷過全程冇人讓座嘅可悲遭遇。
於是乎咯喎，港鐵公司舉辦優先讓座宣傳活動，邀請明星藝人成為讓座大使，希望透過相關活動喚醒大家處於沉睡狀態嘅善良細胞，高抬貴手……唔係……高抬貴臀畀有需要人士。
即係咁，功夫茶絕對贊成港鐵乘客優先讓座，一來係禮貌嘅表現，二來減少人與人之間無謂嘅爭拗吖嘛，之不過想深一層，官場中人係咪都應該宣傳讓座文化呢？喂喂喂，特區政府有唔少官僚尸位素餐，一屁股霸佔高高在上嘅官位就打死都唔願起身。如果有能之士取代無能庸官，起碼有機會阻止港鐵賺大錢依然起勢加價吖！