水務署出晒名係「水皮服務署」，服務水準之低實在令人搖頭嘆息。就講幾乎無日無之嘅爆水管事件吖，左邊爆一爆，右邊爆一爆，不但阻塞交通，而且浪費食水，每年億億聲嘅東江水費就咁流落坑渠，跟住排出鹹水海。如果唔係水皮服務署維修不力，更換水管又進度緩慢，香港納稅人會咁肉赤咩？
水務署另一項擾民行為係容許承建商不斷掘地，掘到坑坑洞洞之餘，仲要係未吹雞已偷步，即係冇按正常時間表做事。喂，飲食文化都講究不時不食啦，掘地如果唔係依照既定時序進行，後果必然係擾民擾到飛沙走石。
好似灣仔馬師道一帶咁吖，半年前陸陸續續出現幾個「神秘地窿」，不但令到駕駛人士非常不便，商戶叫苦連天，亦搞到路人甲乙丙步步為營，一個唔覺意隨時誤墮陷阱而受傷。經過本報記者鍥而不捨追查，終於發現真相係水務署監管不力，直情係累人累物累街坊。
成件事簡單而言係咁嘅，承建商爭取更多時間掘地進行相關工程，並且避免工程延誤而被罰款，水務署竟然默許佢哋偷步開工。最離譜嘅係灣仔馬師道一帶嘅三個工程，原本需時大約兩個月嘅工程，早於既定時間三個月至半年前已經開始掘窿，徹頭徹尾就係一種霸道行為。
喺唔適當嘅時候出現唔適當嘅地窿，真係好鬼死麻煩o架。神秘地窿附近一間公司嘅女職員關女士就有咁嘅遭遇嘞，佢話呀：「七月嗰陣，我有日放工途經地盤，誤踩雜物跌倒，受咗輕傷，點知兩個禮拜後又喺相同位置誤踩雜物，但今次就成個人失重心，右膝先落地，成塊皮反咗出嚟，流咗好多血。」由於傷勢嚴重，關女士決定去醫院治療，最後右膝縫咗十六針，現時仍留有兩吋疤痕。
神秘地窿事件被本報踢爆之後，哈，原本失職嘅水皮官僚火速補鑊咯喎。本報記者再去現場視察，見到坑坑洞洞已被填平，路面回復暢通無阻。之不過咁，窿雖填，恨難平，受影響嘅食肆損失慘重，可以向邊個追討呢？法律界人士就話嘞，承建商偷步開工已屬違法，受影響人士有權提出民事索償。
計功夫茶話齋，既然審計署之前曾經狠狠批評過水務署監管不力，不如針對神秘地窿事件再審多一審又計多一計，睇下水官衙門有冇其他不可告人嘅勾當。你知啦，承建商無端端得到官老爺默許提早開工，霸道掘窿話唔定牽涉利益輸送。本來功夫茶都唔想以君子之心度小人之腹，可惜特區政府出咗幾個類似前特首曾蔭權嘅貪官，防腐之心係無可避免嘅。