吸煙可以致癌大家聽得多，呼吸空氣可以致癌又聽過未？未聽過唔緊要，世界衞生組織話你知，空氣污染的確可以致癌，而且同煙、酒及砒霜冇乜分別，甚至比二手煙尤有過之，所以首次將空氣污染列作最高級別嘅「第一類致癌物」，問你怕未！
世衞專家係咁講嘅，有充分證據顯示空氣污染令肺癌及膀胱癌死亡風險上升，淨係二○一○年咋，全球因空氣污染造成嘅肺癌死亡達二十二萬三千人，當中以中國最多，其次為印度等東亞國家，之後為中美洲及北非，原因係呢啲國家近年急速工業化，對汽車、工廠及發電排放嘅規管不周，且人口密集，所以影響最大。專家仲話，人類每日呼吸嘅空氣已變成一種「混合致癌物」，無遠弗屆，避無可避。
嗱，可能因為地方太細啩，香港今次冇畀世衞組織點名，但講到空氣污染咯喎，香港其實早就名列前茅。呢，舊年世衞組織公布全球二○○八年因空氣污染導致嘅死亡率，香港高踞第八位，比中國內地、印度、越南、孟加拉、斯里蘭卡等地仲要死得人多。而早前本地有項研究亦指出，過去七年香港路邊二氧化氮水平持續上升，每立方米達到二百五十微克，超出世衞嘅標準五倍，去年更加係香港路邊空氣污染有史以來最嚴重嘅一年。七年來，空氣污染估計造成逾七千人提前死亡，亦令政府需額外付出超過十五億元嘅醫療開支，真係唔講得笑o架！
事實勝於雄辯，淨係睇呢啲數字，就知道香港空氣污染有幾嚴重喇。點解會咁？原因可能好多，例如本地發電廠及汽車嘅排放、內地工業廢氣影響等等，但歸根究柢，最主要都係因為港府無能，治污不力。講起真係好笑，目前香港仲用緊一九八七年制訂嘅空氣質素指標，二十六年如一日，喺呢段期間，世衞組織嘅同類指引已作出多次修訂，而本港一直未有跟隨；更搞笑嘅係，就算港府明年更新空氣質素指標，亦只係達到世衞最寬鬆標準咋。唉，港府虛應故事，空氣質素又點可能改善吖！
所以話，港產官僚最鍾意自欺欺人，佢哋對空氣污染束手無策，一味搞埋啲小動作，一時停車熄匙，一時資助更換柴油車，一度仲想推行慳電膽計劃添。前特首曾蔭權爵士口口聲聲要換回藍天白雲，結果藍天白雲換唔到，貪曾自己就成為「氣候逃犯」，都唔知好笑定好嬲。
吸煙致癌，可以戒煙，呼吸空氣致癌，咁又點算呢？世衞組織促請各地政府致力改善空氣質素，解決危機。可惜吖，說時容易做時難，寄望港府改善空氣質素咯喎，港人不如齊齊戴面罩好過！