嘩嘩嘩嘩嘩，幾乎又有一個巨型招牌跌落街呀，幾鬼死得人驚呀！
出事嘅招牌二十呎乘三十呎，萬一真係PK從天而降，後果簡直不堪想像，唯一可以想像嘅係歷史有可能重演，好似幾年前灣仔有一個三百磅招牌跌落街，砸死一個無辜到極嘅女途人。
尋日嘅事發現場係車水馬龍嘅旺角，彌敦道六百零三號新興大廈外牆一個夜總會招牌搖搖欲墜，事關用以固定嘅鋼纜斷咗。警方接報之後非常緊張，出動大批人手維持秩序，消防處亦派人戒備，運輸署下午三時左右決定封鎖彌敦道行車線，結果唔使多講啦，交通癱瘓到嚴重塞車，水蛇春咁長嘅車龍排到尖沙咀。至於附近嘅商舖咯喎，生意當然勁受損啦。
呢件事唔知應該叫做好彩定係唔好彩，原來招牌擁有人曾經接獲屋宇署通知，必須清拆呢一個存在咗好幾年嘅招牌，於是承辦商派工人搭棚準備清拆，點不知發現招牌開始傾斜，吊吊揈嘅高風險現象嚇到工人想唔報警都唔得。
講到爛鬼招牌風險高，不久之前都有另一宗險過剃頭嘅個案。深水埗福榮街一間食肆門外，一個巨型燈箱招牌砰嘭一嘢跌落街，如果唔係食客同街坊閃避得快，搞出人命都有之。當時路邊有一架四驅車，車頂慘遭招牌壓毀。
舉頭三尺未必有神明，不過對於人煙稠密嘅香港嚟講，舉頭三尺必定有招牌。既然通街都係招牌，而且唔少係屬於日久失修嗰隻，係咪應該盡快清拆呀？其實四年幾前已經有人高瞻遠矚，前特首曾蔭權未淪為香港第一貪官之前，率領一班叫做「經濟機遇委員會」嘅精英級烏合之眾，構思由政府撥出一千八百萬元，畀屋宇署清拆五千個危險招牌。咁樣做嘅目的係「刺激經濟」，製造一百七十個職位。姑勿論拆招牌刺激經濟係咪癡人說夢，為市民消除舉頭三尺嘅危機都算係好事，問題係，四年幾以來空口講白話，貪曾執完包袱落咗台都唔見五千個危險招牌被清拆。
好嘞好嘞，今年屋宇署署長區載佳終於舊調重彈，推出「違例招牌檢核計劃」。屋宇署委託合資格人士檢驗招牌，有需要就加固，如果證明安全可以保留，不過之後每五年要再檢驗。區載佳仲話，若然發現危險招牌，署方會要求拆除，如不遵從會派承建商清拆，然後向負責人收費。屋宇署每年目標係清拆一千六百個危險招牌，以及每年二百五十個暫時冇危險但大型嘅違例招牌。
不如咁講啦，瘟神一去萬事吉，反正貪曾已經不在其位，唔再阻住地球轉，屋宇署必須痛定思痛，爛鬼招牌盡快拆，莫讓途人又被殺！