丟架丟架，真係好丟架！因乜事幹香港一次又一次輸畀新加坡嘅呢？
係人都知香港同新加坡係長期競爭對手，早就有「雙城記」嘅講法。以前咯喎，呢個城城同嗰個城城互有輸贏，有時係港仔技高一籌，有時係坡仔棋高一着，雙方施展渾身解數鬥到難分難解，簡直係癲鳳鬥狂龍嗰隻。之但係好可惜，香港最近幾年屢戰屢敗，餐餐都屈居於新加坡之下，睇到各位觀眾眼火爆，恨鐵不成鋼就係咁解嘞。情況就好比愛國愛到發晒狂嘅球迷，不斷見證中國足球隊任人魚肉，嗰種哀慟之情不足為外人道。
屋漏偏逢連夜雨，香港今次連衰兩鑊添。世界銀行發表《2014年營商環境報告》，新加坡連續八年位列第一，香港再次屈居第二。世銀指出，香港實施雙倍印花稅，推高企業嘅轉讓資產成本，對營商環境影響好大，因此拖低整體排名。對於呢一個屈居老二嘅排名，學者係咁講嘅，香港嘅營商環境比唔上新加坡，主要原因係特區政府處理註冊資產嘅效率偏低，唔少發展項目亦受到民間阻力所致。
另外咯喎，英國智庫機構公布最新全球繁榮指數，香港位列十九位，新加坡排名第十八，得到亞洲區最高排名。亦即係話，香港嘅繁榮指數又被新加坡超越，雙城記逐漸浮現出一個「常敗將軍」嘅落魄身影，真係可悲。
可能有人會話，人哋第一，自己第二，成績都唔算太差太瘀皮吖。咁嘅講法唔可以話係錯得太離譜，不過你試下問問英國超級聯賽嘅忠實粉絲吖，佢哋一定唔會為屈居亞軍嘅愛隊歡呼喝采囉，只會認為教出一支二奶球隊嘅教練，既然攞唔到冠軍就應該炒魷魚。
好嘞，究竟因乜事幹香港一次又一次輸畀新加坡嘅呢？計功夫茶話齋，來來去去又係政府弱勢，再加上政客倀雞，咁就搞到香港嘅發展步伐寸步難行，蹉跎歲月嘅結果係人哋長足進步，香港不進則退。政府弱勢成點呢？相信大家都睇過「14巴港女」係點樣掌摑跪地求饒嘅男朋友o架啦，港產官僚咪就係好似嗰個懦弱小男人囉，本地政客係潑辣到極嘅倀雞婆娘，有理冇理摑到對方嘴歪臉腫。左一巴，右一巴，特區政府幾乎每推出一項政策都受到反對派狙擊，而且往往狙擊成功，導致官老爺頻頻跪低。你話嘞，香港有乜可能唔輸畀新加坡呢？
所以真係好激氣o架，激到你奀又激到你壞。如果唔想香港同新加坡嘅競爭繼續輸落去，男兒當自強呀，官老爺唔好再以懦弱男嘅跪地姿勢示人啦，唔該！