有人話，平機會係政治花瓶，純粹用嚟擺設，可有可無。究竟係咪事實呢？睇吓咪知囉。
嗱，平機會自己嘅年報揭露，委員出席率奇低，喺六次定期及特別會議中，全部十六名委員中只有六人「零缺席」，其餘有人缺席四次，有人缺席五次，有人甚至從未出席過會議添，問你服未。試諗吓，如果平機會真係咁重要，點解委員可以隨便缺席呢？又點解會有咁多懶蟲呢？事實證明，平機會的確係可有可無嘅政治花瓶。
有委員話喎，缺席係因為大部分委員有多項公職在身。呢嗱，問題就喺呢度嘞，法定機構愈來愈多，幾乎多過銀行咁滯，但港府一味任人唯親，結果委員來來去去都係同一班人，最誇張係有人身兼數十職，成為本港獨有嘅公職王。呢啲公職王百足咁多爪，周身唔得閒，有乜辦法唔缺席會議吖。
正所謂，冰凍三尺，非一日之寒，平機會委員出席率奇低，唔係今日開始，而係一直都係咁。早喺三年前，本報已踢爆平機會十六名委員中只有五人「零缺席」，而審計署亦曾炮轟平機會等法定機構好似無王管咁，出席率奇低，管理又混亂，點知三年後嘅今日，情況依然冇改善，你話係咪離譜？
不過咁，平時開會冇人到，但講到使錢咯喎，佢哋一啲都唔執輸o架。呢，平機會年報顯示舊年職員外訪、會議及培訓費用暴增，開支逾五十五萬港元，較前一年度增加超過一倍。平機會解釋，支出主要用於培訓員工，包括調查、調解、法律及領袖訓練等課程喎。事實係咪咁簡單呢？咪話功夫茶危言聳聽吖，廉政公署都被踢爆酬酢分單入帳喇，平機會究竟有冇呢啲蠱惑招，真係要查過至知o架。
話時話，平機會係出咗名嘅大花筒，濫用公帑已經唔係乜嘢新聞。最經典係前主席鄧爾邦，除咗出差要住大使套房，仲被譏為「離岸主席」，任內只有三分之一時間留喺辦公室，其餘時間唔係飲飲食食，就係周遊列國，曾被審計署狠批「不稱職」。依家平機會由人稱「每周一鑊」嘅周一嶽負責，睇怕亦唔好得去邊嘅咋。大家都知嘞，周一鑊做食衞局局長嘅時候渾渾噩噩烏龍百出，搞到食品問題多多，醫療事故不斷，平機會落喺呢位廢電池手上，隨時醜上加醜，亂上加亂呀！
所以話，多隻香爐多隻鬼，好似平機會呢啲政治花瓶，唔只對社會冇貢獻，而且是非多多，添煩添亂，根本冇存在價值。既然委員冇興趣出席會議咯喎，不如索性摺咗佢，咁咪皆大歡喜囉，係咪！