公家茅台私有化 廉署反貪勿軟化

東方報業集團舊年六月直擊報道，曾蔭權爵士卸任搬竇時，財物足足裝滿成千個紙皮箱，當中包括最少十箱總值約一百八十萬元嘅名貴茅台酒，全部由禮賓府搬往前行政長官辦公室自用，變相將公家茅台私有化。

奇怪嘅係，政府部門對「偷酒門」含糊其辭，至今依然無人能夠清楚解釋。直至申訴專員公署介入調查，揭發原來特首辦自把自為，已經將回歸後長達十五年嘅存酒紀錄全部銷毀。正所謂，若要人不知，除非己莫為，其他部門嘅存酒紀錄一覽無遺，唯獨特首辦毀屍滅迹，好明顯係有人作賊心虛啦。

貪曾濫用職權，將公家茅台私有化已經涉嫌犯法，事後毀滅罪證更加係罪加一等。正如立法會議員陳偉業話齋，過往有公務員問同事或友人借款五百元至一千元，廉署亦立案調查，最後告上法庭，無理由對「香港第一貪官」貪曾嘅種種醜行視若無睹。

係咯，議員就講得啱嘞，天子犯法與庶民同罪吖嘛，貪曾胡作非為，一般市民就話奈佢唔何啫，作為反貪利器嘅廉署有咩理由無動於衷？其實，東方報業集團舊年接連揭發貪曾「貪遍省港澳，歎盡海陸空」，單單動魄驚心，件件罪證確鑿，即使唔計死無對證嘅「偷酒門」，當局只要揪出任何一項順藤摸瓜，已經足夠將貪曾繩之以法啦，廉署拖拖拉拉，閃閃縮縮，唔通真係有難言之隱？

有辦你睇o架，喺西方國家，新聞第四權嘅監督效果立竿見影，被傳媒揭露醜聞嘅政客大都好快落台受審。就講德國前總統武爾夫舊年捲入受賄七百多歐元醜聞吖，德國法庭月前已經落案起訴佢受賄罪。反觀貪曾嘅連串貪腐醜聞，涉案金額大得多，性質嚴重得多，廉署查到今時今日都未有下文，實在好難令人信服囉。

一句到尾，公家茅台私有化，廉署反貪勿軟化。市民嘅耐性係有限o架，正如民調顯示，超過九成受訪者質疑廉署執法不力，放軟手腳調查貪曾及貪湯事件，有違公義同公眾期望，再咁拖落去，民怨好快燒向現屆政府嘅咋！