尋日喎，有一批為數幾百人嘅北區家長上街遊行，爭取本地學童原區入讀幼稚園。遊行隊伍浩浩蕩蕩，有人全家大細總動員，連嬰兒車都出動，參與人士穿上紅衣象徵憤怒。示威者不滿北區幼稚園入學申請一表難求，雙非學童跨境爭奪學額令本地父母疲於奔命，佢哋又不滿排隊黨炒賣表格猖獗，政府打擊不力，教育局局長吳克儉錯判形勢。
港爸港媽忍無可忍，部分示威者一語道破香港出生率長期偏低嘅關鍵原因：唔敢生仔。
多子多福本來係炎黃子孫嘅傳統，雄性搞大雌性個肚更加係人類嘅動物性本能，之所以會搞到出生人口不斷下降，一句「唔敢生仔」確實講出大部分香港人嘅心聲。喂，如果生兒育女竟然要為咗入讀幼稚園而通宵排隊，瞓街四日四夜都未必肯定能夠搶到一個學額，真係會嚇窒唔少正值春心蕩漾求戀期嘅港男港女o架。
好衰唔衰，出生人口不斷下降之餘，人口老化又迫在眉睫。人口政策督導委員會發表諮詢文件，推算到咗二○四一年嘅時候，香港人口差不多每三個人就有一個年屆六十五歲或以上，男性同女性嘅預期壽命分別增至八十四點八歲以及九十點八歲。現時每一千名適齡工作人士支持三百五十五名受供養人士，二○四一年會增至每一千人供養七百一十二人。
特區政府話要鼓勵生育喎，點樣鼓勵先至有效呢？「東方報業民意調查」結果顯示，四成四受訪者認為減低生育意欲嘅主要原因係置業困難，居住環境狹窄；兩成五憂慮學額不足。換言之，當市民覺得冇地方安居，又冇足夠嘅學額畀寶貝子女讀書識字，生兒育女嘅造人計劃就會束之高閣。如果真係要鼓勵生育，官老爺空口講白話係冇用o架，一定要切切實實解決房屋及教育問題。
對於前朝曾蔭權政府鼓勵市民最好生三個，三成三受訪者批評只係信口開河，既無誘因，亦無配套；三成二狠斥貪曾好大喜功，冇了解市民嘅實際困難；兩成八覺得欠缺完整嘅人口政策。
一提到貪曾，相信大家必然眼火爆。前朝遺禍呢家嘢絕對唔講得笑，試問蝸居一族冇屋住係邊個造成？如果唔係貪曾將公屋興建量大幅減少，小市民排隊上樓都唔使左等右等望穿秋水啦！
冇耐之前有另一項調查顯示，香港嚴重缺乏性活動空間，情到濃時冇辦法做愛做之事。港男港女連魚水之歡嘅機會都少得可憐，出生率唔低至奇啦。所以計功夫茶話齋，若然居住環境唔改善，怕生仔嘅心理陰影係唔會煙消雲散o架！