大家有冇聽過曲突徙薪嘅故事？未聽過唔緊要，功夫茶今日同大家重溫一次。話說有位客人發現主人家煙囪太直，側邊又堆積木材，好易引發火災，於是勸主人將煙囪改為彎曲，並移開木材。點知主人唔聽勸告，後來果然發生火災，好彩左鄰右舍幫助，終於將火救熄。事後主人宴請左鄰右舍，將因救火而燒到焦頭爛額者奉為貴賓。其實，如果主人當初聽從客人勸告，根本唔會發生火警。正如有人話齋，曲突徙薪無恩澤，焦頭爛額為上客。
好嘞，故事講完，講番現實。現實就係長沙灣保安道一個劏房單位尋日爆炸起火，導致一死兩傷，消防指起火原因有可疑，有待進一步調查。嗱，呢場悲劇咪就係港府唔識得曲突徙薪嘅結果囉。這個單位竟然將平台涉嫌僭建，間成十二個劏房，住客幾乎連轉身都有困難，想唔出事都幾難喇！
唔使問阿貴，一個只有豆腐膶大嘅單位間成咁多劏房，九成九涉及僭建喇。果然，屋宇署聲稱上月十九日已向出事單位嘅業主發出清拆令，要求拆除平台僭建物及平台電箱喎。問題就喺呢度嘞，既然屋宇署上月已發出清拆令，點解到依家仲未清拆呢？如果業主懶理清拆令，屋宇署點解又唔跟進呢？唔通所謂嘅清拆令根本就係冇牙老虎？
係人都知，劏房遍地開花，環境惡劣，危機四伏，有如一個個都市炸彈咁，過去已發生過無數悲劇，導致死傷纍纍，尤其係前年旺角花園街四級火造成九死三十四傷，同埋馬頭圍道唐樓大火引致四屍五命十九傷慘劇，至今令人心有餘悸。可惜吖，當局面對劏房亂象，唔係闊佬懶理，就係束手無策，遲遲攞唔出解決辦法，搞到居民惶惶不可終日。正所謂，官不殺伯仁，伯仁因官而死，劏房事故不斷，火警頻生，港產官僚實在難辭其咎o剌。
呢，早前長策會發表報告，推算全港有六萬六千九百間劏房，總共有十七萬人口居住，未計算工廈劏房。但民間組織就估計，全港劏房戶超過二十八萬，淨係工廈劏房就有二萬人居住。好明顯，當局低估劏房數字，根本就係扮鴕鳥，自欺欺人。講起都幾諷刺，香港自稱先進都市，港府更加係窮到只剩下錢，但竟然有咁多市民被迫居住於劏房，仲慘過第三世界國家，你話係咪可悲吖？
無論點都好，悲劇不可一不可再。咪話功夫茶唔提醒，今次長沙灣劏房火警已再次敲響警鐘，如果當局仲唔盡快諗辦法曲突徙薪，消除危機，遲早一鑊熟嘅咋！