今日想同大家講一個典故，叫做「力士脫靴」。講嘅係唐代詩仙李白有次飲酒之後，為咗奚落大太監高力士，故意喺唐明皇面前叫高力士為佢脫靴，高力士迫於無奈，惟有乖乖照做。從此之後，「力士脫靴」就被用來形容文人不畏強權，不受拘束。
好嘞，講完古代嘅「力士脫靴」，再同大家講一個現代嘅「消防脫靴」。話說日前有人報警，指元朗一間服裝店有人「被困」，元朗消防局勞師動眾，派出逾十名消防員帶同斧頭等工具趕去救援，仲出動升降台等裝備添。點知去到現場先至發現，「被困」嘅只係一位中年女士隻右腳，佢「無咁細隻腳，試咁細隻鞋」，結果因為隻腳太大而被靴夾住，難以自拔，愈用力愈被困。佢本來想叫店員剪爛隻靴，但一聽見剪爛之後就要買咗佢，唔肯畀錢之下，卒之報警求助。最好笑嘅係，呢位女士脫極都脫唔到隻靴，但其中一名消防員只用咗數秒就成功令佢「脫困」，你話係咪小題大做吖？
所以話，怪事年年有，今年特別多。逾十名消防員應召救援，居然只係為咗幫一位女士脫靴，如果唔係真人真事，講都冇人信。正如有前線消防員話齋，今次事件屬最典型嘅雞毛蒜皮個案，市民求助前應該三思，以免影響真正有需要嘅人。
係咯，如果個個好似呢位女士咁，雞毛蒜皮嘅小事都報警，例如開唔到汽水罐都要召喚飛虎隊，唔只浪費資源，隨時搞到天下大亂都似。小數怕長計，消防處舊年收到特別服務類型求助中，超過一萬一千宗屬善意虛報，平均每日三十宗，都唔知浪費咗幾多人力物力。仲有吖，如果有人虛報而影響到真正需要緊急救援嘅市民，後果可大可小o架。
嗱，咪以為隨便報警唔需要付出代價吖。有資深消防員指出，為免市民濫用緊急服務，若消防到達現場後發現無人有生命或火警危險，就會報告上級，考慮向事主收費，而收費水平將按出動嘅人數及器材計算，例如無理要求「爆門」，費用可高達五千元o架。話時話，當局出動逾十個消防員幫一位女士脫靴，咁又算唔算善意虛報呢？條數又點計先？
計功夫茶話齋，為他人着想，千祈唔好濫用緊急服務吖。尤其消防處嘅職責係救火救人，更加唔可以不務正業，浪費資源。老實講吖，香港舊樓林立，遍地劏房，危機處處，如果消防處平時真係冇嘢做，不如多啲巡查消防黑點，消除安全隱患，咁樣點都好過一時硬闖報館滋擾傳媒，一時又幫女人脫靴吖，係咪？