冇新聞就係最好嘅新聞，呢句話最啱用嚟形容公立醫院。唔係咩？公立醫院成為新聞焦點之日，往往就係爆發醫療事故之時，唔係搞出人命就係累人傷殘，唔係派錯藥就係打錯針，鑊鑊新鮮鑊鑊甘！
嗱，醫管局最新一期《風險通報》又有醜聞，今年第二季淨係藥物事故就有二十四宗咁多，簡直係五花八門，無奇不有。其中一宗事故係咁嘅，一名左腳患骨筋膜綜合症病人進行緊急手術，懷疑醫生按錯掣，結果病人慘被注射近十六倍麻醉藥，出現心跳過慢及低血壓，好彩經搶救後執番條命咋。同樣係藥物事故，有位靜脈曲張病人先後獲處方兩種抗凝血針劑，護士居然冇做足「三核五對」程序，以為兩種針都係每日打兩次，其後經藥劑師揭發，而病人亦好彩冇造成內出血，否則後果不堪設想。
《風險通報》印證公立醫院的確係危機四伏嘅高風險地區，甚至連嬰兒都可以失蹤，問你怕未。嗱，一名未足一歲嘅嬰兒因跌傷入院治療，社工向母親提議暫時託管嬰兒，點知轉過頭就唔見咗BB，全院大搜索無結果，搞到要報警求助。最後發覺原來係母親怕親生骨肉被搶，所以趁醫護唔覺意時抱走BB，結果擺咗個大烏龍。今次總算有驚無險，但已足以證明公立醫院嘅保安係幾咁兒戲。
睇住呢份好似《杏林奇談》嘅《風險通報》，真係為藥物事故嘅受害病人感到慶幸。嗱，功夫茶唔係幸災樂禍吖，你知啦，公立醫院七國咁亂，病人接受手術隨時慘過受刑，割錯胸、切錯腳、刺錯肺、輸錯血、留低手術用品喺體內當贈品等等，沒有最恐怖，只有更恐怖。所以話，病人能夠從公立醫院全身而退，真係要劏雞還神。
唉，公立醫院危機四伏，醫療事故無日無之，咁嘅公共醫療體制，講出去都醜死人啦。唔怪得有人形容公立醫院好似閻王殿，真係一啲都冇誇張。可以咁講，醫管局管理混亂，烏龍百出，兒科病房有保安漏洞，前線醫護工作甩漏，呢啲都只係冰山一角咋，當局幾時至肯認認真真醫治呢？
人命關天，醫療事故一次都嫌多。人稱「每周一鑊」嘅周一嶽主管食衞局時，就話庸碌無能，搞到醫療體系烏煙瘴氣啫，接任嘅高永文係咪應該手起刀落，好好整治公立醫院呢？不如咁吖，搵一次《風險通報》零通報，當畀市民一個好消息喇，好唔好！