劏房劏房又劏房，燒完一間再一間，長沙灣最近又發生一場劏房奪命火，結果導致一死兩傷。喂，係人都知劏房呢一種港式貧民窟係火災高危之地，官老爺幾時先至能夠防患於未然呀？仲要燒死幾多人先至肯正視問題呀？
今次出事嘅劏房同過往一樣涉及僭建，一個單位竟然劏出十二間房，環境惡劣到簡直不宜人居。屋宇署話喎，上月十九日已向出事單位業主發出清拆令，要求拆除僭建物。之但係好可惜，發出清拆令係一回事，疏於執法係另一回事，屋宇署坐視安全隱患繼續存在，官僚失職嘅代價係小市民慘被燒成一堆炭。
劏房禁之不絕，數量與日俱增，曾經有民間團體調查過，家陣全香港有超過二十八萬個劏房戶。就算以立場保守嘅官方數據為依歸，劏房戶亦有六萬六千九百個，居住人口十七萬，當中超過一半係無水、無廚又無廁嘅「三無階級」。即使唔係一不小心燒通頂，三無階級平時起居生活嘅悽慘情況都聞者心酸啦，衰鬼！
好嘞，長遠房屋策略督導委員會終於推出諮詢文件，建議探討劏房發牌制度咁話喎，規管劏房嘅結構同防火安全。長策會諮詢文件提到，明白一旦實施劏房發牌制度，可能要安置受執法行動影響而必須搬遷嘅劏房住戶。
規管劏房應該冇人會反對，畢竟冇人願意見到接二連三嘅死傷纍纍，問題係，發牌係唔係規管嘅最理想做法？劏房發牌制度會唔會變相鼓勵業主愈劏愈多愈狼胎？正如有長策會成員話齋，不認同發牌規管劏房，因為發牌涉及太多準則，而且缺乏安置劏房戶嘅政策，建議喺重建公屋騰出部分單位作為中轉屋。
其實計功夫茶話齋，發牌規管劏房根本係本末倒置，如果特區政府興建更多公屋，草根窮人唔使苦等三五七年先至能夠脫離港式貧民窟上樓，劏房問題會咁嚴重咩？正正係公屋單位供不應求，無良業主先至會將名下物業劏出一個又一個豆腐膶空間放租吖嘛。
再講吖，唔發牌就唔可以規管劏房嘅咩？唔好玩啦，執法人員嘅神聖天職就係取締非法行為，若然僭建造成危險，你咪走去取締僭建囉，假如劏房唔符合消防條例，你咪走去強制業主改善囉。前政務司司長唐英年僭建出二千呎地下行宮都可以還原啦，功夫茶點都唔信執法人員冇能力以現有法例規管劏房，關鍵只在於有冇人懶得就懶，卸得就卸。
即係咁，劏房係就係必須規管，不過切忌本末倒置，歸根究柢係增加公屋單位供應量，興建公屋期間不妨考慮安排三無階級入住臨時房屋，以免再有人燒死呀，冇陰功！