今時今日，互聯網已經成為大部分市民日常生活不可或缺嘅一部分，只要一機在手，人人都可以係作家，個個都可以係評論員。不過咁，針無兩頭利，網絡為大家提供自由發表言論嘅平台，亦成為不法之徒散播失實言論、肆意誹謗嘅工具。
唔係危言聳聽㗎，網上失實言論氾濫成災，唔只隨時構成誹謗罪，仲可能搞到天下大亂添。呢，最近就有單笑話，自詡「公信第一」嘅《明報》即時新聞網，竟然喺十月一日發布特首「將辭職」消息，引起一片嘩然，有人以為係所謂嘅「B計劃」。後來先至搞清楚，原來特首唔係辭職，而係致辭喎，簡直係差之毫釐，謬之千里。你話嘞，呢啲失實言論係咪隨時害死人吖？
正所謂謠言可畏，互聯網就好似一把雙刃劍，雖然有助資訊流通，提高公眾知情權，但如果被別有用心嘅人用嚟發放誹謗言論，真係殺人不見血o架。正如有律師指出，網上同網下嘅誹謗，一樣屬於永久性誹謗，要負相同責任。可惜現行法例遠遠落後於形勢，導致漏洞百出，對網上誹謗冇監冇管，加上刑事起訴門檻極高，一般受害人只能循民事自行追討，唔止費時失事，仲要負擔龐大訟費，試問幾多人畀得起呢？
「東方報業民意調查」顯示，對於現時網上誹謗、人身攻擊、謠言抹黑等情況，四成二受訪者認為影響個人聲譽；兩成七指誹謗行為肆無忌憚；兩成六認為失實言論已達失控程度。對於現行法例下受害人只能靠自己花錢循民事追究，三成七受訪者認為升斗市民追討無門；近三成人指變相有錢才能維護公義；兩成七直斥當局執法不力，令受害人損失慘重。
最荒謬嘅係，就算受害人願意花錢追討公道，有關網站亦可以「不知情」為抗辯理由，免除法律責任，加上部分網站不設實名登記而難以追查誹謗源頭，受害人只能逐個央求網站刪貼。呢，聽吓受訪者嘅意見，四成人認為網站有責任杜絕誹謗言論；近三成人指互聯網已淪為誹謗溫床；兩成四指網上誹謗無王管，規管如同虛設。
其實講來講去，事在人為嘅啫，打擊網絡誹謗唔係冇辦法，問題係港府肯唔肯做。好似德國、韓國、新加坡咁，早就將網絡誹謗列為刑事罪行；即使號稱最注重言論自由嘅美國，亦有過百條相關法例監管網絡。可惜吖，香港自詡國際大都會，但港產官僚得過且過，胡混度日，根本冇將監管網絡當一回事，卒之咪搞到烏煙瘴氣囉。嗱，咪話功夫茶唔提醒，如果當局對網上誹謗繼續坐視不理，遲早致辭變成辭職嘅咋！