黎智英又名淫賤黎，壹傳媒亦叫壹淫媒，原因壹字咁淺，有人宣淫販賤，而且死性不改。
壹淫媒其中一個賤格作風係不斷侵犯版權，即係盜用知識產權咁解。你知啦，東方報業集團旗下刊物出晒名特別多獨家新聞以及精彩圖片，所以壹淫媒最鍾意盜用東方嘅知識產權，過去十八年已經累積四十九次之多，向東方賠償或向法庭繳款累積逾一百三十萬元，簡直係一個不知羞恥嘅超級慣犯。
最新一宗侵權例子係咁樣嘅。今年五月二十七日東方互動網頁刊登一篇題為「嫣然晚會：王菲抱李嫣睇表演玩手機」嘅報道，當中有一張女藝人王菲嘅照片，之後兩日《東方日報》以及《太陽報》都有刊登同一張照片，點知壹淫媒旗下《蘋果日報》以及《忽然1周》居然厚顏無恥擅用呢一張王菲照片。
版權被侵犯嘅東方當然據理力爭啦，於是採取法律行動追究，結果壹淫媒一報一刊自知理虧，向法庭繳交共四萬零二元作為「附帶條款付款」，並且支付合共四萬五千元律師費。簡單咁講，《蘋果日報》以及《忽然1周》跪低求和。
所以話啫，淫賤黎經營嘅壹淫媒真係劣根難除，類似事件一次又一次發生，如果將過去四十九宗個案全部詳細列出，睇怕要出一本專書先至夠篇幅。為免大家睇到眼都凸，功夫茶淨係再舉一個例子吖。
舊年三月十三日，《東方日報》港聞版刊登題為「鄉局慶典上海仔滿場飛」嘅文章，《太陽報》港聞版刊登題為「上海仔與鄉紳非泛泛之交」嘅報道。同日出版嘅《爽報》晚版，一篇題為「江湖飯局又有新版本鄧賀年承認劉夢熊邀約」嘅報道之中，竟然擅用《東方日報》同《太陽報》嘅圖片。東方發現版權受到侵犯之後入稟區域法院，要求侵權者賠償損失，最終《爽報》扯白旗投降，向法庭繳款二萬零一元作為「附帶條款付款」，並且支付三萬五千元律師費。
對於壹淫媒呢種長期而不斷嘅侵權行為，學者宋立功就講得啱嘞：「有人一而再，再而三咁侵犯人哋版權，完全冇尊重過其他人，如果份份報刊都咁做，仲得了？」
係囉係囉，仲得了嘅？所以立法會議員陳偉業認為，政府應該考慮修例，加強罰則以提高阻嚇作用，以免版權持有人利益受損。
其實計功夫茶話齋，就算唔修例，執法者若然依法辦事，秉公處理，作奸犯科者照樣可以繩之以法啫。喂，侵犯版權係刑事罪行，好嚴重，違例者隨時可以收監法辦，點解當局唔嚴懲盜用東方知識產權達四十九次嘅慣犯呢？講到尾，咪又係有人包庇縱容淫賤黎囉！