一份調查報告，不是令人看後真相大白，而是愈看愈糊塗，這樣的「調查」，一字記之曰：廢！冇錯，老朽指的就是「石油氣的士集體死火事件」，機電署經兩個半月的調查，結果就係的士集體死火原因非常非常之複雜，大家都有錯，大家亦都冇錯。總之，即係「先有雞後有蛋」或「先有蛋後有雞」的問題，一句話：不排除死火事件是由多於一個原因造成。咁即係話，天要下雨，娘要嫁人，的士要死火，半點不由人！
中石化的青衣氣庫，雖有八次未達四小時最低沉降標準的紀錄，可能會影響石油氣品質，卻沒有證據顯示是導致死火事件的直接原因。至於石油氣運輸鏈，運作冇問題，中石化加氣站的隔濾設施及加氣槍都正常，無證據顯示氣缸底積聚物會流入汽車。十四個石油氣樣本，化驗證實唔影響汽車運作。
好喇！去到呢個階段，稍留意呢件事的如老朽，腦海自然浮起機電署官員曾急不及待以政府車輛和業界提供的蒸發器作比較，報告舊調重彈，指有雜質屬正常，只需頻密清洗，即係話見到靚女有性幻想屬正常，只需竭力壓抑，咁就天下太平。
機電署靠此調查報告就可洗脫監管不力之責嗎？也許，世事多撲朔迷離，機電署可以話：即使lover也有個over，即使friend也有個end，即使believe也有個lie。世事無絕對，水落石不出，天意也。
由此看來，的士大佬，再死火唔好投訴咁多啦，與其嘥精神等調查報告，不如努力等運到，揸多兩轉換新車啦！調查報告雖難釋大家疑慮，總算有一系列建議，大家跟住做：一係會死火，一係唔會，世事無絕對啊！