係人都知港府無能，但無能到將神奇化為腐朽，都咪話唔係世間罕見。講緊嘅之唔係長者醫療券囉，本來呢項都算係港府少有嘅德政，可惜吖，當局畀完錢就當萬事大吉，完全冇監冇管，結果係點？梗係亂象叢生喇。
嗱，消委會尋日提到長者醫療券被濫用嘅問題，話去年接獲七宗相關投訴，較前年多出一倍。其中一個個案係咁嘅，有長者配老花眼鏡，店員為咗賺到盡，游說老人家買兩副同款唔同色嘅，話一副出街戴，另一副留喺屋企戴喎，咁就扣咗二千蚊，好過去搶。又有個案嘅老人家去睇中醫，五日藥費連診金高達四千蚊，將累積嘅醫療券一鋪清袋，擺明當長者水魚咁撳。
其實消委會接獲嘅投訴只係冰山一角咋，睇吓衞生署數字咪知囉，每年涉及醫療券嘅投訴以倍數上升，去年更達到七十二宗，多過一五年及一六年嘅總和，證明濫用問題幾咁嚴重。鬼咩，港府自從一四年開始將長者醫療券恒常化後，過百萬合資格長者每年有二千蚊醫療券，而且金額最多可累積至五千蚊，今年更額外多獲一千蚊添，醫療券加碼梗係好啦，之但係無王管呢下弊，無良奸商見有機可乘，有着數可搵，點會輕易放過吖。
所以話啫，一日最衰都係港府。根據規定，醫療券唔可以用嚟純粹購物，包括藥物、眼鏡、海味或醫療用品，衞生署懶有型咁話，有機制處理唔遵守計劃嘅服務提供者，甚至不排除報警處理喎，但事實擺喺眼前，醫療券既被用來配眼鏡，又被用來買海味，無良奸商唔係對使用醫療券嘅長者開天索價，就係氹佢哋落疊使冤枉錢，完全違背醫療券嘅原意，變質變味。類似亂象五花八門，層出不窮，咪就係拜當局懶監管甚至冇監管所賜囉。
大家試諗吓，海味黑店有海關放蛇跟進，劏客惡導遊會被旅議會釘牌，連「黑的」都有警方專門打擊，如果當局有心監管醫療券亂象，無良奸商根本無碇企，點可能咁放肆吖，講到底係不為也，非不能也啫。港府畀咗錢就關人個關，到頭來醫療券淪為奸商提款機，關愛長者變成資助無良奸商，連帶納稅人都做埋冤大頭，港府點止無能，簡直係冇心冇肺、助紂為虐喇！
一句講晒，港府大事唔識做，小事做唔好，連咁簡單嘅醫療券政策都搞到事與願違，亂象百出，仲話「好打得」喎，簡直笑大人個口。咪話功夫茶唔提醒，香港人口老化速度愈嚟愈快，高齡海嘯迫在眉睫，港府再唔加強監管，嚴懲違規，點止醫療券益咗無良奸商，長者得物無所用喎，再好嘅政策都係嘥氣嘅咋。