「出得嚟行，遲早要還。」喺前年春節旺角暴亂中扮演重要角色嘅本土民主前線前發言人梁天琦，日前被判暴動罪成，判監六年，今次法庭判決完全正確，不過就唔係好似有啲人講嘅彰顯法治與公義，事關一眾幕後黑手連毛都冇少一條，法律面前人人不平等呀！
法官都話嘞，旺暴當晚班暴徒準備充足，又盾牌又口罩，完全係有預謀犯案。亦有立法會議員話，成件事係有人喺幕後揸莊，如今法庭淨係判班後生仔去坐監，班幕後黑手、燈下黑就繼續逍遙法外，叫政府咪諗住過咗海就神仙，要揪出幕後黑手嚟落鑊咁話。
即係咁，大好青年變身冷血暴徒，黑夜旺角淪為伊拉克戰場，絕對唔係冇原因嘅。係人都知，年輕人血氣方剛，對現實不滿，想改變社會，本質其實唔壞，衰就衰喺腦囟未生埋，無帶眼識人，輕易中咗「違法達義」、「公民抗命」嘅毒，於是乎，「精人出口，笨人出手」，變咗政治炮灰都未知，仲以為自己係「守護香港」添，即使犯嘅係嚴重刑事罪行，依然覺得係「關心社會」、「目標正確」、「有理想」嘅表現。結果被法庭重判，入獄唔係使人生「變得更精彩」，而係留下洗唔去嘅污點，前途盡毀，呢個時候喊都無謂咯。
你知啦，冇戴妖鼓吹「違法達義」，就冇佔中；冇佔中，就冇旺角暴動，咁多青年人淪為政治犧牲品，真係多得戴妖唔少。奇就奇在，任憑戴妖喺校園誤人子弟又好，去埋台灣鼓吹港獨也罷，港府都係冇佢符。仲有喎，漢奸黎係佔中黑手、金主兼埋前線總指揮，港府同樣無奈其何。咁就難怪呢兩條友有恃無恐，爛果報日前雞乸咁大隻字話梁天琦「勇於承擔，不會放棄香港」喎，將一個罪犯「英雄化」，即係繼續鼓動年輕人做替罪鬼啫。戴妖一樣惡頂，對於自己嘅學生被判監，佢仲要風涼到話：「判得啱」，點止冇品吖，簡直唔係人。
一日最衰都係港府，明知戴妖同漢奸黎等係罪魁禍首，但遲遲唔敢郁佢哋，戴妖雖然被charge，但法庭排緊期，方便佢老哥繼續搞風搞雨，操控選舉；至於漢奸黎咯喎，黑金案走得甩，刑恐東方記者案一拖再拖，佔中案更加係泥牛入海無消息，你話佢哋冇保護傘照住，港府唔係驚咗佢哋背後嘅外部勢力，三歲細路哥都唔信。
大家睇到啦，佔中發生至今快四年嘞，被判嘅都係無知無腦無背景嘅魚毛蝦蟹，有洋人撐腰嘅牛鬼蛇神就繼續逍遙快活，港府選擇性執法，司法選擇性判決，仲話法治之區喎，呃鬼咩！