根據造物主嘅安排，貓同老鼠係天敵，雙方勢不兩立，不過喺「轉基因」大行其道嘅今日，原有嘅基因都可能變晒，家陣嘅貓唔止唔捉老鼠，仲分分鐘同老鼠Friend過打Band，貓鼠一家親咯喎，蛇蟲鼠蟻唔湧晒出嚟作惡至奇。
好似本港警方嘅「雷霆18」行動風風火火，日日拉人封艇，之但係睇真啲，不難發現當中有古怪。事關這邊廂警方高調掃黑，那邊廂黑幫高調犯案，蛇蟲鼠蟻掃極都有，就連釣魚機、麻雀枱、假難民藏械販毒大小罪案乜都齊，唔通黑幫真係唔知死字點寫？
非也。黑幫之所以當警方隱形，連曱甴仔都當支「殺蟲水」冇到，大蟲掃極唔走，講到尾係有錢使得鬼推磨啫。正所謂拿人手短，吃人嘴軟，警黑勾結點止係影視劇情咁簡單，現實生活大把，廉署拉都拉唔少嘞。老鼠餵到隻貓肥屍大隻咯喎，隻貓仲邊識捉老鼠(口架)。咪睇警方呢期掃黑好似好大陣仗，其實都係求其做吓騷交吓差咋，如果唔係北大人落咗order，警方可能連蝦兵蟹將都懶得捉。
嗱，行家一出手，就知有沒有。睇吓內地吖，中央一聲令下掃黑除惡，各地雷厲風行，唔止嚴打黑惡勢力，仲講明對幕後保護傘一查到底、絕不姑息，唔出手猶自可，一出手就大小通殺。中央牌殺蟲水噴一噴啫，小蟲反肚，大蟲拉柴，連保護傘都收皮，全部冇碇企，幾勁呀。反觀香港牌殺蟲水弱過弱雞，一啲殺傷力都冇，頂多趕走部分蟲仔，大蟲睬你都傻，把鬼成咁，都唔知係咪香水嚟嘅。蛇蟲鼠蟻明知風頭火勢都唔收斂，仲話「雷霆行動」喎，毛毛雨都冇幾滴，「雷停行動」就差唔多。
唔係咩，當局平時大大聲話香港係安全城市，罪案率低，點知收到中央命令啫，掃一掃就有一堆臭蟲曱甴，擺明之前係粉飾太平。情況就好似坑渠蓋咁，一揭開就臭氣沖天，到底仲有幾多蛇蟲鼠蟻潛伏喺下面，真係冇人講得埋。老老實實，香港烏煙瘴氣成咁，港府冇可能唔知，明知都扮睇唔見，係咪有更大把保護傘將地下運作揞住，特登唔想畀中央見，你話呢？
話時話，食環署呢期又學人全港捉鼠，一個月捉咗六百幾隻，但係放毒餌及捕鼠器嘅地點就多達七千個，即係平均十多個地點先捉到一隻，擺明Hea做。此情此景，咪同警方掃黑一樣都係表面文章囉，所以話啫，香港嘅病貓係捉唔到老鼠嘅，掃黑除惡始終要靠中央出手，最重要係連退咗休落咗台嘅保護傘都掃埋，唔可以畀佢哋軟着陸，否則香港倒退番清朝食大煙收規年代，仲得掂嘅！