正所謂你有張良計，佢有過牆梯，好似低價團劏客咁吖，以前惡導遊明刀明槍強迫旅客購物就聽得多，家陣居然發展到扮旅發局人員收「報關費」，唔怕你班羊牯唔就範，真係唔到你唔服。
本報記者最近直擊一個內地港澳團，當團員準備出發過大海之際，突然殺出一名既非導遊、又非領隊嘅女士，自稱係旅發局嘅「送關員」，向每人收取一百三十大元「報關費」，仲威脅唔畀嘅話唔發放澳門船飛添！
明眼人一睇就知，所謂「報關費」，只係劏客團巧立名目嘅屈錢手法，旅發局亦已澄清絕無此事，懷疑涉及詐騙，已經向警方通報，問題係船飛喺對方手，肉隨砧板上，據理力爭都嘥氣。有旅客反駁團費已包埋船飛，點知畀個「送關員」兇番轉頭，冇錢唔好學人跟團旅行，為免惹麻煩，惟有息事寧人破財擋災。呢嗱，咪睇小呢盤「生意」吖。淨係計五一假期本港旅行社接待四百個團，每位盛惠百三銀，已經穩袋一百五十萬元，直頭肥過肥仔水。
唔講唔知，原來「送關員」喺業內極之普遍，有旅行社更加會聯同旅遊巴公司，聘請冇任何牌照嘅人充當「送關員」。問題嚟嘞，對於無良旅行社嘅劏客新招，無論係港產官僚、旅發局抑或警方都好似發緊夢咁，如果唔係本報及時踢爆，相信呢條水仲有排食，唔知仲有幾多旅客中招吖！
冇計喇，港產官僚出名四方木，踢極唔郁。自從八年前爆出惡導遊阿珍狂鬧旅客醜聞後，各界要求嚴厲打擊低價團亂象嘅呼聲一浪高於一浪，可惜港產官僚一味闊佬懶理，關人個關，淨係成立旅遊業監管局，講咗N年都仲係只聞樓梯響。大家有眼見，零團費亂象近年愈演愈烈，旅客購物唔足Quota被遺棄街上有之，被禁錮購物點有之，甚至乎激死旅客都試過，沒有最離譜，只有更離譜，講到尾都係因為官老爺冇做好自己份工！
咁當然，呢個世界上冇咁大隻蛤乸隨街跳，旅行社打開門做生意，冇可能做蝕本生意，無論定點購物抑或「報關費」，都係呢個道理，無論旅客點樣企硬，旅行社一樣有本事從石頭裏鑽出血，好多時衝突就係由此而起。但唔理點都好，好事不出門，醜事傳千里，香港「好客之都」嘅金漆招牌就此不保，到頭來蝕底嘅都係我哋自己。
本港旅遊業經歷佔中、驅蝗、鳩嗚、港獨、反水客等連串政治事件後，幾乎得番半條人命咁滯，家陣叫做有番少少起色，無良業界竭澤而漁，港產官僚胡混度日，好了傷疤忘了痛，結果成個旅遊業畀佢哋搞彎晒！