「知錯能改，善莫大焉。」做咗十二日短命立法會議員就被DQ嘅游蕙禎尋日被判刑後選擇唔上訴，即時入獄，為自己當初嘅言行付出代價，敢做敢當，都算係一條女漢子。尤其係佢喺求情信中講到過去搞政治無暇他顧，連患病嘅父母都冇法子陪伴，心中愧疚，如今遠離政治，重拾親情，仲要立志做番一個孝順女，呢啲咪叫幡然醒悟咯。
出得嚟行，遲早要還。游蕙禎由月袋十萬元酬勞嘅尊貴立法會議員，淪為今日階下囚，仲要欠落一屁股債，直頭由天堂直接跌入地獄，人生大起大落，大喜大悲，嗰種失落，嗰種迷茫，一般人係無法理解嘅。講真，年輕人血氣方剛，行為衝動，做出宣獨及辱華嘅違法行為，最終闖出大禍，教訓不可謂不慘痛。好在佢淨係要坐監四個禮拜，眨吓眼就過，吃一塹，長一智，出嚟好好做人，仲有大把前途嘅。
話時話，唔理游蕙禎又好，之前捲入旺暴案被判監嗰班年輕人都好，都已經為自己嘅鹵莽行為付出代價，令人痛心之餘，更加令人反思，點解咁多大好青年走上違法之路，搞到要鋃鐺入獄，人生留下不可磨滅嘅污點？佢哋嘅行為不計後果，固然太傻太天真，更重要係漢奸黎同邪惡教授戴妖之流鼓吹「違法達義」，荼毒大批無辜青年。
最最令人無法接受嘅係，違法嘅年輕人紛紛受罰入獄，始作俑者到依家仍然逍遙法外。律政司最叻選擇性檢控，有洋人背後撐腰嘅老虎屁股不敢摸，走狗尾巴碰不得，一時話「證據不足」，一時話「證據太多」，放生藉口要幾多有幾多，班冇權冇勢冇背景嘅年輕人唔恨得咁多。港府麻鷹唔捉捉雞仔，大玩雙重標準，香港法治塊爛招牌燒咗佢罷喇！
大家睇到啦，漢奸黎旗下壹淫媒成日煽風點火，戴妖就誤人子弟，入世未深嘅年輕人一不留神墮入圈套，被佢哋利用做爛頭蟀、替死鬼都唔知咩事。睇吓嗰班佔中黑手吖，出盡牙力妖言惑眾，叫人哋仔女衝上前，自己仔女永冇話落場癲埋一份，佢哋紛紛送仔女留洋讀書，爭取前程錦繡，遠離香港呢塊是非之地，等到人哋嘅仔女被判監嘅判監，逃亡嘅逃亡，佔中黑手嘅仔女咪施施然回流香港，做番律師、醫生等高尚職業，享受美好生活囉！
所以話啫，精人出口、笨人出手係亘古不變嘅鐵律，年輕人關心社會係好事，但最緊要帶眼識人，認清是非，千祈唔好以為專食細路嘅「狼外婆」只係寓言故事，事關現實生活大把呢啲咁嘅壞人敗類，一時糊塗落疊，咁就一世o架喇！