嗱嗱嗱，天理循環，報應不爽呀。壹淫媒集團尋日發出盈警，預示下周一公布業績再次錄得巨額虧損，而同時壹淫媒嘅股價亦創歷史低位。壹淫媒多行不義必自斃，對廣大市民嚟講梗係好消息喇，簡直要「熱烈地彈琴熱烈地唱」吖。
市場估計，壹淫媒截至今年三月底將較上年度虧損增加兩成一，達到四億七千幾萬元，距離摺埋又近一步。業績慘不忍睹，壹淫媒嘅股價好似玩跳樓機咁直插谷底就梗o架喇，二○○○年高峰期每股都值四個六o架，尋日就跌到得番兩毫四仙咁大把，睇怕躋身「神仙股」都係遲早問題咋。
業績衰成咁，點向股東交代呀？有羞恥心嘅切腹都唔掂喇，不過壹淫媒勝在面皮夠厚，例牌搬出「市場情緒低迷、廣告支出謹慎」，「全球激烈競爭導致廣告消費下降」，「讀者習慣閱讀免費網媒」一類廢話，賴到冇嘢好賴咯，索性賴落一班慘被出賣嘅員工頭上，話裁員須支付代通知金導致開支增加喎，爭在冇話被「政治打壓」啫。
查實搵埋咁多藉口都係蒼白無力嘅咋，壹淫媒之所以落到今日地步，原因一字咁淺，就係自我作賤，咁多年嚟宣淫販賤，反中亂港，結果被讀者及市場唾棄，搞到旗下出版物唔係賣盤就係執笠，再唔係就爽死，尤其係年初出售《壹週刊》爛尾成為致命一擊，家陣得番一份爛果報苟延殘喘，睇怕都唔捱得幾耐咯。有財經分析員就講得啱嘞，壹淫媒流血不止，回天乏術，投資者放長雙眼睇佢點死好嘞，千祈咪沾手呀。
都話喇，唔係唔報，時辰未到；時辰一到，一切都報。可能都知嗰頭近啩，漢奸黎一連兩日急召壹淫媒高層去何文田大宅密斟救亡，不過咪畀功夫茶批中，漢奸黎天生契弟難自棄，所謂救亡咪又係搵班員工開刀，即管睇吓又有幾多員工被迫假自僱喇。所以話啫，男怕入錯行，女怕嫁錯郎，壹淫媒員工上錯賊船咯喎，被用完即棄都預咗咯。
咁講喇，江山易改本性難移，咪睇漢奸黎陷入窮途末路，但一樣會上演最後嘅瘋狂，事關佢仍有洋人撐腰，更有港英餘孽照住。其他唔講，淨係講刑事恐嚇東方記者案，案發一年嘞，漢奸黎繼續逍遙法外，東方七度去信律政司質問查案進展，點知對方睬你都傻，咁即係點？即係律政司認咗做漢奸黎嘅保護傘囉。
不過咁，港府怕咗漢奸黎啫，法律冇佢符啫，仲有個天收佢吖嘛，仲有市場力量吖嘛，漢奸黎會有乜嘢下場，睇吓秦檜、吳三桂、汪精衞一干人辦就估到嘞。