尋日係粵港澳三地警方為期三個月掃毒除黑「雷霆18」大行動嘅第一日，香港警方天蒙光就搗破咗個武器庫，表面睇係威係勢，實際上又係雷大雨小，始終根治唔到打擊罪案唔夠徹底嘅痼疾。
呢嗱，深水埗警區情報組尋日清晨五點聯同重案組探員，突擊搜查通州街橋底俗稱「南亞村」嘅木屋群，搗破咗一個藏有長劍、斧頭、鐵通、利刀同鐵鈎嘅武器庫，拉咗四男三女，部分人士有黑幫和勝和背景，其中一名被捕嘅越南籍男子更加係持有「行街紙」嘅假難民。不過咁喎，差佬呢次掃蕩一啲都唔夠乾淨徹底，事關佢哋高調拉完人同檢走武器後就收隊走人，困擾深水埗居民多時嘅「南亞村」依然如故。試諗吓吖，假難民同本地黑幫狼狽為奸，無惡不作，南亞村就係呢個治安大毒瘤嘅象徵，南亞村一日唔拆除，盞野火燒不盡，春風吹又生嘅咋。
講起都好笑，民政處同食環署早前出動近五十人，浩浩蕩蕩走去拆「南亞村」嘅違章建築，點知勞師動眾花咗半日時間，最終只係拆咗一間木屋咁大把，被人笑到面黃，狂鬧佢哋有姿勢冇實際，一味淨係識做騷。家陣通州街天橋底被南亞假難民長期佔據，木屋群最少都有兩百間，唔止衞生環境惡劣，治安亦都愈來愈差，舊年更有黑幫公然喺橋底斬雞頭、燒黃紙，「開壇」招攬南亞假難民入會，擺明唔放警察在眼內，挑戰「法治」，警方難得打住個「雷霆18」牌頭入去，都唔趁機嚟個「犂庭掃穴」，將呢個治安毒瘤連根拔起，明顯係辦事不力。你話嘞，連一條「南亞村」都唔敢掂，又點畀到市民信心可以解決南亞假難民治安問題吖？
冇錯，當局小打小鬧，點都好過乜都唔做。起碼警方十九日內掃咗多單同和勝和有關嘅毒品案，又搗破唔少地下賭檔同麻雀館，好歹都叫做斷咗黑幫部分財路，將佢哋嘅經濟收入來源堵死，總算係打擊黑幫嘅其中一種有力方法。之不過咁，打蛇七寸，擒賊擒王，警察拉嚟拉去都係啲黑幫爛頭蟀，始終解決唔到問題，直接緝拿幕後黑手歸案，咁先至治標又治本吖嘛。
話時話，警隊近年喺香港市民心目中嘅形象已經大不如前，到最近更加係雪上加霜。和勝和前坐館、大毒梟「上海仔」郭永鴻一句「中風」，唔使向警方報到不特止，仲可以自編自導自演多段影片，涉嫌誹謗警方高層，黑幫頭子囂張成咁，都係警方之前軟手軟腳惹的禍。一句到尾︰人善被人欺，警軟被人恰，為人為己，警方都應該玩鋪勁嘅，一次過斬草除根！