香港唔止人口老化，樓宇老化嘅速度更加驚人。唔係講笑，現時全港約有一萬幢樓齡四十年或以上嘅舊樓，當中包括公屋，好多都因為日久失修而危機四伏，港府再唔加快重建步伐，隨時發生意外都似。
嗱，城規會尋日舉行公聽會，就香港仔華富邨重建規劃及薄扶林南公營房屋用地收集意見，結果演變成華富邨居民申訴大會。席間有居民代表怒轟港府虛度光陰，重建十畫未有一撇，淪為紙上談兵；又話即使港府提出嘅重建規劃未如人意，居民都願意袋住先，無非希望加快重建，改善環境，點知港府唔嗲唔吊，同畀假希望居民冇分別喎。
又難怪居民咁㷫嘅，華富邨雖然背山面海，環境一流，仲被譽為「平民豪宅」，但畢竟已經接近五十年樓齡，塌天花、甩批盪、滲水已經係家常便飯，維修成本分分鐘高過重建成本。再講吖，港府早於五年前已完成評估二十二條非拆售高齡屋邨嘅發展潛力，華富邨係少數獲敲定重建嘅公屋，當時居民對雀屏中選萬分高興，殊不知等了又等依然重建無期，唔嬲就假。
真係諗極唔明，既然大部分居民同意重建，因乜解究當局仲要諮詢復諮詢呢？原來港府計劃將薄扶林南五幅土地改劃為遷置用地，但當中兩幅土地屬於綠化地帶，引起唔少保育人士疑慮，加上有私人屋苑居民反對，擔心區內交通不勝負荷，城規會仲收到成三千份反對書，足足比贊成多出逾倍，都唔知點收科。
睇到喇，原來主因又係保育爭議。近年類似爭議愈來愈多，往往搞到拓土建屋寸步難行。冇錯，保育係好重要，但點都唔及解決居住問題咁重要啩，當住人嘅地方都唔夠，仲要講保育未免陳義過高，不切實際。何況公屋重建必須配合原區安置，難得南區有土地安置華富邨居民，保育人士咁都要反對，想唔畀人話阻住地球轉都唔得嘞。
當然喇，連公屋重建都出現咁大阻力，講到尾係港府無能咋。試諗吓，如果港府唔係一遇阻力即跪低，房屋問題就唔會積重難返；如果高官唔係無膊頭無腰骨，就唔會乜都議而不決，無所作為。大家都知，舊邨重建既可改善居住環境，又可增加房屋供應，淨係華富邨重建已可增加過萬個單位，完全係官民雙贏，偏偏重建一直只聞樓梯響，港府唔係廢柴又係乜吖。
見微知著，港府連重建一條屋邨，搞足四、五年依然一事無成，咁土地供應專責小組所謂嘅「土地大辯論」，到底對尋求社會共識、覓地建屋有幾大幫助，唔使問都知嘞啩。