「六四」就快到，有人例牌吹雞叫市民集會。冇錯，六四係值得紀念，不過就唔單止係一九八九年天安門廣場嘅六四，仲有去年維園嘅六四燭光晚會上，壹傳媒老闆漢奸黎涉嫌粗口辱罵兼刑恐東方記者，踐踏新聞自由，律政司拖到家陣仲唔肯落Charge起訴佢，呢一日對香港嚟講就係新聞自由嘅忌日，市民真係「不想回憶，未敢忘記」吖！
呢嗱，為咗討回公道，本報尋日第七度去信律政司，要求就漢奸黎涉嫌刑恐東方記者一事作出實質回覆，點知律政司繼續扮鴕鳥，之前都仲話有官式回信，帶人遊吓花園，依家直頭睬你都有味。官老爺平時開口埋口彰顯法治、維護公眾利益，政務司司長小肥張仲寫網誌，話香港有「完善及獨立的司法制度同法治精神」，事實證明純屬廢噏。
講真，若果律政司唔敢做、唔敢告漢奸黎，使乜畏畏縮縮、躲躲閃閃呀，夠膽嘅就乾脆照直講，無謂繼續做縮頭烏龜，好似喺法庭影相嗰位內地奇女子咁，一句「我喜歡拍照便拍照」，何其率性，鄭若驊司長如果夠膽講句「我喜歡放生便放生」，林鄭如果夠膽講句「如果呢個係事實，就惟有係事實」，就直頭係「膽自大」添！
睇過《水滸傳》嘅都知啦，柴進柴大官人係皇室後裔，獲賜「鐵券丹書」，點樣犯法都唔使被追究。計功夫茶話齋，港府倒不如效法古人，白紙黑字賜漢奸黎以「丹書鐵券」，上書「禍港無罪，殃民有賞」八隻大字，等漢奸黎可以掛喺身、戙喺屋企同壹淫媒大樓；再唔係可以好似古裝片咁，打兩塊「肅靜、迴避」嘅大牌畀佢出街用，等市民見到都可以退避三舍。反正香港「法治之都」塊招牌早就打柴，律政司早就淪為「亂政司」，不如四四六六同市民講清講楚，等大家死咗條心好過喇。
世上沒有無緣無故嘅愛，亦沒有無緣無故嘅恨，律政司親疏有別，愛國愛港人士被極速檢控，漢奸黎被明縱暗護，梗係有原因喇。係人都知，港府不嬲畏洋如虎，加上內部充斥無間道，明知漢奸黎背後有外部勢力撐腰，唔買佢怕至奇。更何況，唔少港府高官唔乾唔淨，有痛腳被人捉住，除咗僭建驊上任之初日日被狙擊，高層仲有冇其他更加唔見得光嘅嘢，冇人話得埋，其身不正，何以正人，見到漢奸黎咪自矮三分，投鼠忌器囉！
一句到尾，有律政司咁大把保護傘照住，漢奸黎冇有怕，本港新聞自由獲「平反」嘅機會，分分鐘低過天安門廣場運動吖！