正所謂，年紀大，機器壞。近年升降機嚴重事故層出不窮，上水名都嗰單仲搞出人命添，簡直聞者心驚。鬼咩，人會老，升降機一樣會殘，五勞七傷不足為奇，機電署監管敷衍，維修商保養兒戲，有乜法子唔出事吖。
港府終於知衰嘞，林鄭尋日喺立法會好口響咁話，願意支援更換老化升降機，港府會作出政策及財政承擔喎。有立法會議員就建議港府成立二十億元基金，好似樓宇更新大行動咁，資助樓宇更換升降機，港府拍晒心口話有得諗。講就好聽嘞，問題係政策幾時推出先？
嗱，升降機及自動梯安全諮詢委員會尋日舉行特別會議，有人贊成達到一定機齡嘅升降機須強制更換，有人就認為唔應該一刀切，應由機電署判斷更換優次，而且可以只換零件而毋須整部換新，結果言人人殊，莫衷一是。以港府凡事一味拖嘅施政作風，由委員會取得共識到真正落實政策，都唔知係何年何月嘅事咯。
唔係講笑，全港有六萬幾部升降機，一半機齡達二十年或以上，衰啲講句，港府一味研究復研究，諮詢復諮詢，大鑊隨時爆完又爆嘅咋。再講吖，次次升降機事故，幾乎都係通過年檢或例行保養冇幾耐發生，上月荃灣「火箭升降機」事故係咁，名都嗰單一樣係咁。一次就話巧合啫，次次係咁就有古怪嘞，好明顯，維修商做嘢是是但但，機電署監管馬馬虎虎，話係草菅人命就差唔多。
話時話，自從十年前大埔富善邨升降機發生急墜十層樓事故後，機電署就做咗唔少亡羊補牢嘅措施，包括引入評級制，定期公布承辦商評級及工程人員註冊制度，又修例加強罰則等，點知事故依然不絕如縷，證明監管形同虛設。業界就踢爆絕望真相，直指升降機意外頻生，同價低者得嘅投標制度有直接關係。承辦商冇肉食咯喎，將貨就價在所難免，加上現時全港只有六千名維修人員，人工低、工時長，走馬看花就梗嘅嘞，仲要冇乜新人願意入行，咁嘅情況下，維修質素點會好吖。
點都好喇，人命安全係重中之重，點樣強調都唔過分。港府固然要加快落實更換升降機政策，機電署更要加強監管，最重要係設法提高維修人員待遇，增加人手。你知喇，香港地少人多，樓宇向高空發展，升降機數目只會愈來愈多，市民連搭(車立)都要搵命博，講出嚟都醜喇。
不過解鈴還須繫鈴人，計功夫茶話齋，更換升降機仲未夠嘅，一定要有配套，咁就唔該順便換埋機電署官僚嘅腦袋，否則佢哋一味以舊思維辦事，治標唔治本嘅咋！