送走羊年，迎來猴年，一元復始，萬象更新，謹祝各位讀者萬事勝意，龍馬精神。恭喜發財！恭喜發財！
好嘞，恭喜之後言歸正傳。今時今日發財固然重要，而健康更加重要，尤其係各種疫症虎視眈眈，絕對唔可以掉以輕心。講到底，健康至係最大嘅財富，只有強健嘅體魄，至有快樂嘅人生，否則講乜都係假。
唔係杞人憂天o架，香港已經進入季節性流感高峰期，公立醫院求診人數急劇飆升，病房更加逼到滿瀉，加上肆虐南美嘅寨卡病毒來勢洶洶，大有威脅全球之勢，萬一殺入香港，咁就大劑喇。
提起寨卡病毒，真係唔講得笑。正如專家話齋，孕婦一旦受到感染，寨卡病毒就會通過胎盤感染胎兒，可能引致胎兒患上先天性小頭畸形症，甚至可能出現腦退化添。目前總共發現有十三種伊蚊帶有寨卡病毒，香港話就話未發現最危險嘅埃及伊蚊，但根據過去登革熱傳播經驗，只要寨卡病毒傳到東南亞或者內地，香港都幾難幸免。
正因為寨卡來勢洶洶，而且至今未有疫苗，所以全世界都嚴陣以待。世衞一早發出警告，指寨卡雖然喺南美爆發，但中國及其他出現登革熱嘅國家亦可能受到蔓延。話時話，目前確診國家及地區已多達三十多個，除咗美洲之外，歐洲亦有部分個案，連泰國都中招，你話香港可唔可以獨善其身吖？
正所謂，唔怕一萬，最怕萬一。農曆新年係港人外遊旺季，泰國就係熱門旅遊地點之一，萬一有人外遊中招，隨時將病毒傳入本港(口架)。
疫症就快殺到埋身，港府究竟有乜防範措施呢？冇錯，當局係就係將寨卡病毒列為法定呈報傳染病，仲呼籲孕婦或計劃懷孕嘅女性唔好去高危地區添。不過咁，淨係靠把口防疫係唔夠嘅，最緊要採取實際措施，尤其係加強口岸檢疫，將病毒拒於門外，咁先至係萬全之策吖。
當然喇，講係一回事，做係另一回事，香港究竟可唔可以避免受到寨卡侵襲，仲要睇過至知。前事不忘，後事之師，當年沙士一疫，就係因為港府後知後覺，把關不嚴，先至搞到雞毛鴨血，奪去近三百條人命，呢個慘痛教訓至今令人猶有餘悸，當局千祈唔好重蹈覆轍吖。
一句講晒，預防勝於治療，要防止寨卡病毒破門而入，除咗口岸把關唔可以鬆懈，滅蚊工作同樣重要。香港有咁多衞生黑點，再唔盡快清理，冇人敢擔保唔會孳生傳播寨卡病毒嘅惡蚊。新年流流最緊要平平安安，如果港府唔打醒十二分精神，「迎春接福」變成「迎春接毒」，咁就大吉利是喇！