後日就係大年初一，正所謂新年流流，中國人一向講意頭，買花要花開富貴，戴帽要鴻運當頭，食團年飯更加要發財好市。偏偏流年不利，不祥之兆接二連三，真係大吉利是！
嗱，本港年初一預料會出現罕見天文異象，金、木、水、火、土五顆行星同時出現，連成一線，天文學家稱之為五星匯聚，中國人就稱之為五星連珠。古人話，天降異象，必定有因。對於呢種罕見嘅天文異象，有人話係吉兆，有人話係凶兆，有人就認為非吉非凶，各有各嘅道理。之不過咁，如果睇番香港嘅現實，睇怕都係凶多吉少咯。正如有人話齋，今時今日嘅香港紛紛擾擾，自甘墮落，就算有吉祥之兆都趕走晒喇。
唔係亂講o架，香港上一次出現五星連珠，係二○○五年一月，當年同樣係紛紛擾擾，同樣係經濟低迷，結果冇幾耐董建華就腳痛落台，你話係咪不祥之兆吖？正所謂，寧可信其有，不可信其無，五星連珠十一年後重現香江，絕對唔係好兆頭，港人最緊要自求多福。
大家有眼見，最近怪事連連，講都冇人信。早前動植物公園有隻絨猴無端端凍死，前日立春，海洋公園又有隻金絲猴「虎虎」猝然離世。猴年來臨之際，接二連三傳來凶兆，問你怕未。虎虎四年前由四川「移居」香港，一直生生猛猛，活潑可愛，日前仲連同另外兩隻金絲猴接受傳媒採訪添，點知猴年伊始，即離奇死亡，都咪話唔邪。
咪以為係危言聳聽吖，近年香港直情好似撞邪咁，頭頭碰着黑，連天氣都反常。早前啱啱經歷五十九年來最凍嘅寒潮，搞到天文台倒瀉籮蟹，大帽山冰封馬路，近日以為天氣回暖喇，點知寒潮再度來襲，港人又要被迫過一個據講係有紀錄以來最凍嘅除夕，就好似經濟尤其係旅遊零售業面對嘅嚴冬咁，真係好應景（口架）。
都係嗰句喇，福無私予皆天賜，禍不空生自有招。五星連珠究竟係吉係凶，視乎大家點睇嘅啫，如果香港自強不息，欣欣向榮，五星連珠就係五星拱照，天寒地凍一樣生機勃勃。相反，如果香港繼續陷於政治泥沼，內鬥內耗，蹉跎歲月，想唔多災多難都幾難。尤其係依家經濟低迷，百業凋敝，加上政府無能，政客無良，假難民又氾濫成災，成個香港七國咁亂。所以話，黃大仙靈籤顯示香港未來一年運程兇險，仲一連指點三支下下籤，為歷年來最差嘅一次，唔係冇道理o架。
「蜃樓海市幻無邊，萬丈擎空接上天。」黃大仙以「太白撈月」發出警示，唔通香港真係好似詩仙墮江咁，一沉不起？