三個老人一個窮 扶貧咪再大隻講

社聯最新數字顯示，香港貧窮人口由二○一一年嘅一百一十五萬一千人升到二○一二年上半年嘅一百一十八萬七千人，整體貧窮率達百分之十七點六。最觸目驚心嘅係，貧富懸殊同貧窮長者人數同時創出有紀錄以來新高，○二至一二年十年內，高收入同低收入家庭嘅入息中位數差距由三點三倍升到三點六倍，而貧窮長者就由二十五萬五千人增加到三十萬五千人，即係平均每三個老人就有一個貧窮，比整體貧窮率高接近一倍。

講嚟講去，都係前朝留低嘅爛攤子，曾蔭權爵士一味傍住富商黐飲黐食，着數攞盡，點會關心窮人同老人家呀。冇錯，香港經濟蛋糕愈做愈大，可惜窮人分到嘅就愈來愈少，尤其貧窮長者更加叫天不應，叫地不聞。試諗吓，除咗香港之外，邊個國際金融中心會有咁多老人家靠執紙皮維生吖？

扶貧安老講易唔易，講難唔難，一切事在人為，只要引入全民退休保障制度，長者貧窮問題即刻解決大半。弊在前朝政府涼薄無情，唔止拒絕研究全民退保，甚至連扶貧委員會都摺埋，卒之咪搞到貧富懸殊不斷惡化囉，貪曾禍港殃民，累人累物，真係一啲都無講錯。

現屆政府話要「穩中求變，務實為民」，又重設扶貧委員會，又話要全面改善安老服務，係威係勢咁，最怕講多過做，有姿勢冇實際嘅咋。

呢，扶貧委員會尋日舉行非正式會議，勞工及福利局局長張建宗亦出來交代扶貧政策，點知口水多過茶，講來講去都係嗰句，喺今年內設定貧窮線喎。

喂，設條貧窮線就可以解決問題咩？正如社聯話齋，單靠監察無法解決貧窮問題，當局必須制訂明確嘅扶貧目標，推出具體嘅扶貧措施，譬如訂立低收入家庭補貼制度、最低工資一年一檢、改革退休保障制度等等。其實，港府庫房水浸，大把資源，就算長遠扶貧政策制訂需時，都應該及時推出短期紓困措施，紓解貧苦大眾燃眉之急。

講到尾，三個老人一個窮，扶貧咪再大隻講。新一年度財政預算案將於下月公布，到底當局係真心開倉紓困、還富於民，定係好似前朝咁搞埋啲小恩小惠、雷大雨小，好快就知。