好彩好彩，真係大話夾好彩，沙田火炭發生三級火災，不幸之中嘅大幸係冇人傷亡。
起火地點係火炭坳背灣街一幢工業大廈，一踏入二○一三年元旦就出事，凌晨三點左右燒到火紅火綠，簡直同維港放煙花互相輝映。一小時之後消防將火警升為三級，動員一百四十人，出動四條喉同四支煙帽隊灌救，出盡九牛二虎之力先至喺早上大約十點救熄。由於出事工廈嘅消防升降機故障，消防員要徒步將救火設備搬上十樓，可想而知難度有幾高。消防處新界東區指揮官譚隸強係咁講嘅，起火單位面積三十乘二十平方米，樓底高四米幾，其中三分之一面積搭建咗一個閣樓，存放大量電腦製成品、棉紗、模型玩具等等可燃物品。
呢嗱嗱嗱，工廈單位無端端有一個閣樓，好難避免令人聯想到兩個字：僭建。你知啦，高官又僭建，權貴又僭建，新界鄉紳更加係僭建得星火燎原，僭建問題已經成為香港嘅毒瘤，一提起僭建就令人咬牙切齒。假如工廈單位嘅起火原因同僭建有關，主理房屋政策嘅相關官僚肯定再一次成為眾矢之的。
提到房屋政策，不得不提工業大廈另一個可怕現象。喂，有冇聽過有人入住工廈劏房呀？部分無良業主將工廈單位瘋狂改建加僭建，一劏就劏出幾十個白鴿籠咁細嘅所謂住宅，住客話就話繳付廉價租金，實際上以呎計價簡直貴到離晒大譜。最令人擔心嘅就係，萬一大吉利是唔知邊個衰神觸發無情火，消防設施簡陋不堪嘅工廈劏房隨時變成人間煉獄，土瓜灣馬頭圍道以及旺角花園街嘅劏房奪命火就係前車之鑑。
唐樓又劏房，工廈又劏房，有團體估計現時全港有二十八萬戶蝸居一族入住劏房，點解會咁蔚然成風嘅呢？講來講去咪就係房屋政策太失敗囉，以致窮苦大眾貧無立錐之地，唔想瞓天橋底就要迫於無奈入住轉個身都有困難嘅劏房。
搵朝唔得晚嘅香港人真係好命苦o架，公屋輪唔到，居屋買唔到，私樓價格貴到冇朋友，入住劏房似乎已經變成冇選擇之中嘅選擇。唔止工廈有劏房o架，最近本報踢爆，大埔有一座教堂轉售之後，新業主居然十字鎅豆腐鎅出大量劏房出租，原本敬拜天父嘅神聖殿堂家陣不時晾起底衫底褲再加幾個胸圍，你話唔係上帝也瘋狂都唔得啦！
即係咁，火炭工廈發生三級火等於響起令人毛骨悚然嘅警鐘，僭建唔取締就好大鑊，劏房唔消失就好大劑，房策唔改進就好大煲。主理房屋政策嘅相關官僚，如果閣下唔想僭建出嚟嘅劏房惹出禍患連連，唔該唔好咁失敗啦，畢竟廢柴都係一種好惹火嘅可燃物品！