吓？同香港一水之隔嘅深圳原來通街都係黑心食品，會唔會一不留神就會殺入香港o架？你知啦，特區政府嘅把關能力一向都係有限公司，千奇百怪嘅黑心食品既然近在咫尺盤據深圳，真係令人憂慮到心震！
深圳嘅情況係咁嘅，當地市場監督管理局抽檢結果顯示，市內八十五種產品不合格。令人震驚嘅係，部分火鍋原料驗出含有羅丹明B，毒性同蘇丹紅不遑多讓。其他不合格嘅麵製品仲檢測出含有苯甲酸，呢一種物質只能作為治癬藥用於外敷。治癬藥就係醫治腳癬、手癬以及體癬等等，食落肚會有乜嘢後果o架？專家就話嘞，攝入過量苯甲酸損害肝臟。
黑心食品嘅名單未完o架，深圳市部分麵包店所賣嘅蛋糕，抽查結果顯示含鋁量超標。成年人過量攝入鋁會引起神經系統病變，增加老年性癡呆嘅風險。兒童長期食用鋁含量超標嘅食品，可能造成神經發育受損導致智力發育障礙。鋁對造血系統、免疫系統亦有一定毒性，同時妨礙鈣、鋅、鐵、鎂等等元素嘅吸收。
至於羅丹明B又係乜乜東東呢？深圳市監局解釋，呢一種元素係工業用染料，不容許添加於食品之中。經過老鼠實驗，羅丹明B會引致皮下組織生肉瘤，懷疑係致癌物質。
請原諒功夫茶細細個嘅時候冇好好研習化學，其他喺深圳市面上驗出嘅乜鬼嘢山梨酸呀，乜鬼嘢過氧化苯甲酰呀，基本上完全冇概念。功夫茶只係知道一件事，人體吸收太多化學元素一定唔會係好事，輕則屙嘔肚痛，重則一命嗚呼！
深圳食品令人心都震，帶出兩個滴汗嘅大問題。首先，北上尋歡嘅香港人真係小心小心再小心，盡可能避免進食火鍋附送嘅治癬藥，除非你認為自己嘅腸胃生癬啦。其次，食環署以及所有相關官僚請記住，好好歹歹為香港人幸福着想，千祈唔好再瞌眼瞓任由黑心食品如入無人之境，背靠祖國嘅香港人一定唔想誤吞羅丹明B囉。
所以話啫，中國人唔做壞事嘅時候其實真係絕頂聰明o架，尤其係化學天才簡直無與倫比，諾貝爾化學獎隨時成為囊中物，得獎之後斷估唔使好似和平獎得主劉曉波一樣坐監。喂，如果唔係有咁多奸商炮製嘅黑心食品，大家又點會認識到咁多化學名詞？功夫茶以前完全唔知乜嘢叫做三聚氰胺，家陣知嘞，原來係國產奶粉必不可少嘅化學元素。
話時話，中國人已經因為國產奶粉不可靠而湧到世界各地搶購奶粉，以後會唔會因為日常食品不可靠而將全世界嘅糧食搶購一空o架？如果發展成咁，蝗蟲論恐怕歷久不衰。