萬眾期待，矚目登場，行政長官梁振英終於發表任內第一份《施政報告》嘞，請鼓掌！
振臂一呼，英氣襲人，梁特首嘅報告到底報告咗乜嘢呢？其他例如「重中之重」嘅房屋問題功夫茶唔講住，不如集中睇一睇扶貧政策。
CY話喎，香港社會整體富裕，但仍有不少人生活困難，要承認問題嘅存在同正視問題嘅本質，制訂可行嘅扶貧政策措施。梁特首嘅目標係為社會上有能力工作嘅弱勢社群提供自力更生同改善生活嘅機會，並以公共資源照顧不能自助嘅人士。考慮到香港經濟結構同社會發展模式，政府不能採用以高稅率支持嘅福利政策。
咦，政府不能採用以高稅率支持嘅福利政策，即係唔會好似歐洲同美國咁樣設立打劫紅毛鬼、進貢法蘭西嘅「富人稅」，藉此劫富濟貧，似乎幾啱聽喎，事關香港賴以成功嘅基石之一係低稅制，冇理由將有錢佬趕去移民外國逃避苛稅啫。
之但係歸根究柢有一個問題，到底具體嘅扶貧政策係乜乜東東芫荽葱呢？
梁振英就話嘞，政府月前重設扶貧委員會，以三層架構推展扶貧工作。扶貧委員會已確定其中一項首要工作係根據香港嘅實際情況訂立「貧窮線」。貧窮線有三大功能：量化貧窮人口以集中分析各組群嘅情況；深入研究貧窮成因，作制訂政策嘅指引；按貧窮人口數量嘅變化，評估政府扶貧措施嘅成效。振英哥哥跟住仲講到，貧窮線嘅制訂顯示本屆政府對改善貧窮問題嘅決心同承擔。
嗯……即係……點呀？功夫茶聽完仍然一頭霧水，說好的幸福呢？說好的扶貧呢？說好的民生無小事呢？說好的急民之所急呢？貧窮線就好比一條起跑線，原來家陣連起跑都未有一條線，仍然有必要左研究右研究，檢討來再檢討去，要等到訂立出一條貧窮線先至有希望展開扶貧工作，蚊都瞓時蛇都死啦！
難怪有基層市民批評特首將責任推卸畀扶貧委員會，亦有學者認為市民難免失望，因為政府要顧及扶貧委員會嘅工作自主性，期望施政報告有具體政策係不切實際。
唉，睇怕功夫茶都有資格執筆撰寫《施政報告》，對於任何問題不外乎八字精髓即可迎刃而解：開放務實審慎探討。至於探討咗乜嘢結果呀？因為開放吖嘛，所以政府冇一個既定立場。
嗱，功夫茶絕對贊成唔好阻住現任特首撥亂反正，以務實精神將前朝遺禍一一清除。之但係咁喎，呢樣要研究，嗰樣要檢討，莫講話百廢待舉而未舉吖，淨係以窮人百萬大軍而言，窮到瘦甚至餓到死都未必等到政府出手啦！