香港嘅空氣污染問題點解搞嚟搞去都搞唔掂？有人話係因為汽車廢氣太多，其實計功夫茶話齋，主要係港府廢官太多就真！
嗱，眼前就有一單廢官「治污」不力嘅例子。上年施政報告提出，斥資一億五千萬元資助全港石油氣的士同小巴一次性更換催化器，以減少路邊廢氣排放，按計劃今年中應該展開更換工作，並於六個月內完成。點知江山易改，本性難移，官場嘅懶散陋習比空氣污染更難根治，更換催化器計劃依家仲係無影無蹤，環保署回覆本報查詢時承認，工作遲遲未啟動，目前處於為更換催化器招標階段，招標公告尋日正式刊憲，截標日期係明年二月八日喎。
你話係咪離譜吖！一個原本年中展開嘅減廢計劃，搞到依家先至開始招標，喂，二○一三年都嚟緊喇，港產官僚究竟點做嘢？難為環保署仲好意思死撐，話預計明年年中為業界更換催化器，到一四年上半年完成喎。
唉，市民出街吸廢氣都夠辛苦啦，仲要聽埋啲官腔廢話，唔谷爆至奇。更加激氣嘅係，更換催化器計劃被延誤一年有多，影響所及，原本打算明年引入十二台路邊遙測系統，透過紅外線檢測車輛廢氣污染物濃度嘅環保大計，亦要順延至一四年上半年先至能夠落實。咁搞法，市民幾時至唔使日日吸廢氣呀？香港幾時至可以撥開雲霧見青天呀？
所以話啫，空氣質素長治久污，汽車廢氣固然係原因，但庸懶廢官先至係禍首。常言道，一葉知秋，見微知著，催化器雖小，但已足以睇出港府嘅環保工作係幾咁馬虎，幾咁兒戲。計起上嚟，減汽車廢氣工程拖一年幾算少咯，本港空氣質素指標已經用咗廿幾年，港府多次話要更新，但等到世界末日都未見影呀，而最搞笑嘅係，新指標就算兩年後真係夠運如期實施，仍然遠較世衞標準寬鬆，甚至比內地新標準都不如，你話本港空氣有乜可能唔長治久污吖！
咁講啦，如果話催化器老化搞到路邊廢氣混濁，咁港官腦袋殘缺就肯定會搞到香港烏煙瘴氣。係人都知，空氣污染殺人於無形，環保官僚無爭分奪秒補鑊改善空氣質素，反而懶懶散散唔嗲唔吊，呢樣措施耽誤一年，嗰樣政策拖延兩載，香港話唔定真有一日應驗京官所講，淪為死城！
一句講晒，環保官僚唔好再渾渾噩噩啦，「氣候逃犯」曾蔭權爵士已經落台，身為「氣候逃兵」嘅大小官僚係時候悔改。如果唔係，香港要更換嘅就唔止係催化器，仲有呢班庸官呀！