香江弊在有貪曾 來港取經難防腐

呢嗱就咁，改革開放三十多年令到神州大地唔少人「先富起來」，同一時間亦都「先腐起來」，做官嘅大貪特貪，經商嘅大奸特奸，搞到國家領導人自我詛咒「不反貪防腐必亡黨亡國」。總書記習近平日前更加疾言厲色咁話要從嚴治黨，要將權力放入制度嘅籠內，建立不敢腐嘅懲罰機制、不能腐嘅防範機制、不易腐嘅保障機制，要堅持老虎同蒼蠅一齊打，堅決查處領導幹部違紀違法案件，切實解決發生喺群眾身邊嘅不正之風同腐敗問題。

朝廷既然有令，微臣不敢不從，廣州紀委常委梅河清就話嘞，借鑑香港同澳門嘅官員財產申報公示制度，春節之後率先喺南沙區啟動三百多名副處級以上幹部公示財產。佢仲話，計劃組團前往香港同澳門考察取經添。換言之，古有唐三藏遠赴天竺取西經，今有國產官員拜訪港澳取南經，講起都幾搞笑。

問題係，逢迎上意嘅欽差大臣南下取經有用咩？前往香港同澳門考察廉政公署就可以收到肅貪倡廉嘅正面效果？計功夫茶話齋，早幾年或者有用，家陣取經嘅意義已經不大，反而可能愈學愈貪添。

喂，以前就話香港勝在有你同ICAC啫，今時今日已經變晒質啦，經過前任特首曾蔭權爵士七年遺禍，上上下下貪婪成性，唔係違規僭建貪圖額外空間，就係官商勾結貪圖富貴榮華，內地官員來港取經可以話係來遲幾步。廉潔奉公本來係香港嘅核心價值，但係自從前政務司司長許仕仁涉貪被捕，曾蔭權亦因為被本報踢爆連串貪腐醜聞而成為廉署調查對象，廉潔奉公遲早淪為集體回憶。即係咁，香江弊在有貪曾，來港取經難防腐！

大家唔好忘記，澳門都不遑多讓，貪腐情況更加同香港有莫大牽連。睇下澳門前運輸工務司司長歐文龍世紀巨貪案吖，到目前為止所披露嘅內幕只係冰山一角，涉案嘅仲有香港富商劉鑾雄以及羅傑承，背後仲有五個超級富豪，而呢啲超級富豪同曾蔭權又有千絲萬縷嘅關係。簡單咁講，香港同澳門係五十步笑一百步。

所以話啫，內地話要反貪防腐當然係好事啦，以免亡黨亡國噩夢成真吖嘛，只不過來港澳取經九唔搭八，根本就係侮辱人民智慧。若然廉署繼續任得貪曾逍遙法外，廉潔奉公無法元神歸位，功夫茶建議內地官僚改道去新加坡取經，事關呢一個國家嘅廉潔程度早就拋離香港呢一個長期競爭對手喇！