強積金廣告搵豬仔錢罌做標誌，話積穀防饑喎，其實計功夫茶話齋，強積金嘅象徵性標誌應該係豬籠至啱。點解？強積金出晒名低回報、高收費，受託人吸盡民脂民膏，簡直係豬籠入水喇。強積金淪為強迫金，打工仔焗住月月奉上血汗錢，好似被困豬籠，想走都走唔甩呀，陰功！
打工仔被困強迫金，一句講晒，皆因官老爺無做好佢哋份工。嗱，強積金千瘡百孔周圍漏水唔在講，當局連補鑊都補到唔湯唔水，好似早前推出強積金半自由行，話有助降低收費喎，點知收費不降反升，參與僱員寥寥無幾，你話港產官僚係咪靠害吖？
好嘞，半自由行行唔通，咁點算？本來呢，窮則變，變則通，既然半自由行行唔通，惟有諗其他辦法喇。勞工界立法會議員係咁講嘅，強積金已經淪為「強蝕金」，大財團食水愈嚟愈深，而打工仔積穀防老嘅美夢愈嚟愈渺茫，制度必須全面檢討，甚至廢除，改推全民退休保障。
冇錯喇，全民退保諗得過o架，呢啲先至可以令市民老有所養，老有所依。對呢個建議，當局又有乜嘢反應呢？佢哋嘅反應就係o架應，財經事務及庫務局局長陳家強對港府做強積金受託人嘅建議一口拒絕，淨係承諾會立法設定收費上限喎。
唉，陳家強花名叫「傻強」，果然人如其名，傻更更。強積金涉及大財團利益，當局要求佢哋稍稍下調收費咋，都搞到一敗塗地，立法封死收費上限，本來係有得諗嘅，可惜無三五七年都做唔到啦，到時打工仔嘅積蓄恐怕都蒸發得七七八八咯。自己知自己事，港產官僚嘅施政特色就係議而不決，決而不行，加上港府弱勢捱打，施政舉步維艱，市民寄望你哋立法，不如寄望自己中六合彩好過啦，嘥氣！
港產官僚渾渾噩噩，唔好當打工仔係傻瓜至得o架，供咗十二年強積金，驀然回首發現身陷金融天仙局，傻強仲笑口騎騎同大家講：「繼續玩落去啦，幾年之後就連本帶利贏番嚟o架喇。」你估市民仲信唔信吖？
咪話功夫茶踢爆吖，港產官僚無嘢叻，最叻做施政騙子呃呃氹氹，搞全民退休推三推四，叫政府做強積金受託人又耍手擰頭，梗係想貫徹少做少錯、唔做唔錯嘅官僚作風啦。官老爺無做好自己份工，結果咪害到打工仔焗供「強蝕金」，捱到風燭殘年都無啖安樂茶飯食囉。
一句講晒，強積金變強蝕金，全面退保別溫吞。好多打工仔搵朝唔得晚，一分一毫都有血有汗，好心港產官僚肉緊啲啦，如果真係搞唔掂班金融大鱷，不如索性取消強積金，畀打工仔自己儲錢，咁仲實際喇。