教堂變劏房，工廈變教堂，上帝也瘋狂。香港嘅生活環境千奇百怪乜都有，籠屋同劏房遍地開花，原因到底係乜嘢呢？請恕功夫茶不厭其詳講多次，就係因為特區政府嘅房屋政策太失敗，失敗到小市民無處容身，一個二個迫於無奈淪為蝸居一族。即使閣下係收入相對較多嘅中產階級，買樓自住都唔係一件容易嘅事，畢竟官老爺養肥地產商，搞到私樓呎價動不動都過萬元，花費幾百萬買到嘅依然係一個細到冇朋友嘅劏房，吹脹！
立法會名義上叫做為民請命，尊貴議員自然唔會唔關注劏房問題。議員黃毓民就批評嘞，政府冇掌握關於劏房嘅具體數字，亦不承諾全面取締劏房，係默許劏房作為解決本港住屋問題嘅折衷方法。議員梁耀忠亦都話，政府認同劏房有存在價值，傷透市民嘅心，因為根本冇人想住劏房，只係迫於無奈。
對於議員嘅發言，你估運輸及房屋局副局長邱誠武點樣回應吖嗱？佢話喎，政府冇全面掌握涉及劏房嘅數據，困難係現時要進入有關單位或工廈調查，必須得到業主同意。邱副局長又形容，部分劏房「劏得好四正」冇違規，過去有人即使獲編配非市區公屋，但最終冇上樓，選擇留喺市區劏房居住，反映劏房滿足部分人短期住屋需求。邱副局長強調，政府嘅政策係確保劏房安全，並唔係全面取締。
功夫茶想問一問邱副局長，香港到底仲係咪一個法治之區？若然劏房安全就唔使取締，咁前司長唐英年違規僭建都唔使還原啦，斷估掘深咗多出一個地下行宮應該唔會死人冧樓啩！
政府冇全面掌握劏房數據，唔係因為入屋有困難，而係官僚主義懶得就懶。民間組織「全港關注劏房平台」就做過一項調查，中西區、觀塘、九龍城以及深水埗等等六個地區，樓齡三十年以上嘅私人大廈合共超過四千個單位，其中百分之四十二改建為劏房。民間組織以民政事務總署嘅資料推算，全港劏房至少六萬七千個，大約二十八萬戶家庭入住。你可以話民間組織嘅推算唔準確，但點都叫做有個概念吖，政府一句話入屋有困難就冇劏房數據，搵笨咩！
議員真係批評得冇錯o架，邱副局長之流嘅官老爺的而且確默許劏房存在，甚至乎不惜厚顏讚一句「劏得好四正」，無他嘅，你叫官場飯桶交出公營房屋單位解決問題辦唔到吖嘛，咁咪任由劏房住客自生自滅囉。無奈實在係無奈，惟有祝福邱副局長唔好因為失職而被搣甩俸祿，最終變成「甩副局長」。