垃圾當肥料，多得佢唔少。廣州番禺金山村有菜農被揭發使用未分類垃圾，包括廢棄電池、舊膠樽、塑膠廢物等做肥料，嚴重污染菜場，事件震驚中港兩地，內地官員日前仲話化驗結果顯示蔬菜冇事喎，你信唔信吖？
如果你信，你就太傻太天真喇。內地有關部門化驗過該區農地土壤，發現重金屬鎘和鉻超標，其中鎘含量超出標準兩倍有多。正如專家話齋，土壤含重金屬超標，可能會轉移至農作物，一旦重金屬透過農作物進入生物鏈，其他家禽同魚類亦可能受到污染。即係話，附近嘅果樹、家禽與魚塘等，隨時殘留人體無法分解嘅重金屬，人類長期進食咯喎，唔止損害免疫力同肝、肺、腎功能，孕婦甚至可能誕下怪胎。用生態災難嚟形容今次事件，一啲都冇誇張o架。
眾所周知，番禺除咗有蔬菜供港，仲有活家禽同淡水魚等等，可以話，香港隨時被「垃圾肥」食品攻陷，唔驚就假。立法會議員王國興就講得啱嘞，當局至少要留意番禺供港菜場有冇用「垃圾肥」，必要時提高監測標準，保障港人健康。冇錯喇，港產官僚要醒醒定定吖！
最離譜嘅係，有農業部專家仲大派定心丸，聲稱土壤重金屬含量只係一個參考值，只要所種嘅蔬菜檢測冇超標，就可以安全食用喎。喂，有冇兒戲啲吖，先唔講內地檢測蔬菜未必信得過，依家土壤重金屬含量嚴重超標喎，咁都話可以安全食用，簡直混帳。
點樣解救？廣州市農業局話喎，除咗加強檢測，亦會修復受污染嘅農地。嗱，大家聽住先，根據專家計算，修復鎘超標農地每畝需要一、兩萬元人民幣，菜農肯唔肯出錢，真係令人懷疑，佢哋之所以使用「垃圾肥」，就係為咗慳錢，依家要攞咁大筆錢出嚟修復，唔出蠱惑至奇。更何況，淨化土地最少需要五、六年時間，修復得嚟蛇都死喇。
再講吖，今時今日嘅神州烏煙瘴氣，處處都係殘山剩水，幾乎搵唔到一片淨土，就算番禺菜農肯修復農地，都無補於事喇。早排有項研究發現，全國不孕不育人口超過四千萬，足足係二十年前嘅四倍，工業污染、有毒食品、輻射污染係罪魁禍首。唉，中國人再次淪為東亞病夫，連傳宗接代都成問題，再咁落去，遲早亡種滅族都似！
嗱，大家咪以為唔關香港事吖，一損俱損一毒俱毒，內地烏煙瘴氣，冇啖好食，香港都唔好得去邊嘅咋。咪話功夫茶唔提醒，港府除咗要加強同內地相關部門溝通，仲要提高檢測標準，唔好再畀有毒食品流入本港，否則，盞大家冇運行嘅咋！