黃耀富：我係小強！

被譏矮仔 激發上進心

Cap帽、黑超、長頸鏈，縱然沒有G Dragon報稱的1.77米身高，外號「Fu Dragon」的黃耀富在鎂光燈下猶像漆黑中的螢火蟲，同樣專業：「其實足球同演藝事業好似，只不過藝人在舞台表演，我們就在球場上演出，同樣是要娛樂觀眾。」從16歲港甲出道便被取笑為「矮仔」、「侏儒」，幾多難聽說話也聽過，今日換上「Fu Dragon」式潮Look造型，偶爾與好友陳偉豪在facebook上針鋒相對，有人說他浮誇自大，更多卻是換來球迷派Like。

「足球要有Noise先有人留意，我又唔係做衰嘢，衰嘢就話唔知醜啫！如果有人留意，叫你男神又好，笑你矮又好，咪認咗佢囉，做球員如果唔畀人鬧得不如唔好做！好彩我都有班阿叔支持，鼓勵叫我繼續踢落去，你話如果係學生妹就好咯！」 「富仔」說來鏗鏘有力，能在港超屹立不倒16年，卻絕非「靠把聲」。昔日自知身高不足便苦練頭槌，就連首席鋼門葉鴻輝亦曾被他頂破大門，即使退居後備亦從無怨言：「唔夠好波咪冇得踢，有乜好呻！我34歲仍然踢得，年輕球員應該反省自己是否付出足夠努力，能否跑得快過老鬼？」

經常同老友陳偉豪（右)喺社交網「娛樂」球迷，好多人Like。	34歲加盟元朗．再闖職業生涯高峰。	阿富（下）感激元朗肯簽佢，只要有機會落場定必搏盡。

34歲老鬼 幫過卓卓擦鞋

回想出道初年曾為卓卓擦鞋，與陳偉豪從界限街「推車仔」運送裝備到九龍仔練波，因為捱過苦，才更懂珍惜：「賺錢是為咗生活，但當生活足夠應用便不可忘本，要堅持自己理念。」運輸、珠寶Sales……為生活，富仔曾打過15份工，去季初離開流浪後轉踢澳門業餘聯賽，出場費每場5至6千元，卻始終難捨這份足球情意結。

「踢波同演員最大分別係遊戲規則要你到某個時候就要停，所以今季我同元朗簽下半季合約，一方面幫助小將成長，一方面保持狀態出戰5人賽。」即使他朝引退，現已是5人青年隊教練的富仔，仍盼將不服輸精神繼續承傳：「我同『小強』一樣打不死！」

文：Kaka

攝：司徒子文