大家睇戲都睇過啦，當德國納粹黨兵敗如山倒嘅時候，一代魔頭希特拉走上末路，佢哋一定會臨急臨忙銷毀大量文件，以免殺人如麻嘅確鑿罪證落入盟軍之手。亦即係話，壞人做完壞事通常都會毀屍滅迹，務求博大霧逍遙法外。
好嘞，如果你係貪腐醜聞纏身嘅前特首曾蔭權爵士，臨落台之前你會做乜嘢企圖甩身呢？最正路嘅推測就係銷毀大量文件，以免廉政專員公署順藤摸瓜查個水落石出。好衰唔衰，家陣冇任何法例保障政府檔案免被銷毀。
申訴專員公署主動調查過，審視本港公開資料以及政府檔案管理制度。原來喎，不具法律約束力嘅《公開資料守則》自從九五年頒布以來，十幾年都冇修訂，政府總部搬遷至添馬艦嘅時候，銷毀嘅文件高度等同於三幢國際金融中心，當中包括貪曾嘅私務以及財政檔案。審計署前年亦發現，有部門冇遵照守則，出現遺失同銷毀檔案嘅情況，日後如果要知道政策制訂嘅來龍去脈，就冇第一手資料查證。
關於呢一類問題，「東方報業民意調查」發現，對於政府總部搬遷之時銷毀大量政府檔案，四成五受訪者直斥做法不當，不應該銷毀；兩成三認為會失去記錄政策及推動施政過程嘅依據；兩成一覺得保護政府檔案制度有不足之處。
當被問到特首辦銷毀曾蔭權任內文件，四成五受訪者指摘會剝奪市民知情權；三成質疑有人亂用公帑都冇人知；一成五認為傳媒難以監察。
呢嗱嗱嗱，好明顯啦，小市民都明白政府文件不能隨便銷毀嘅重要性，萬一搞到冇證冇據，查唔到有人以權謀私就冇天理啦。以前嘅包青天大老爺就話有本事透過超自然力量「審烏盆」啫，家陣嘅廉署乜都要講究白紙黑字嘅證據，文件一旦銷毀，唔通你叫佢哋去搵神婆問米？咪玩啦，不問蒼生問鬼神係唔可以作為呈堂證供打老虎o架！
民意調查又顯示，大部分受訪者認為，特首辦銷毀文件會影響調查貪曾嘅工作，三成三擔心廉署難以搜集足夠證據；另外三成三憂慮資料不完整影響調查進度；兩成四批評透明度低涉及黑箱作業。
其實計功夫茶話齋，道理一字咁淺，政府文件絕對唔可以話銷毀就銷毀，因為涉及嘅人同事可大可小。即使唔係直接證明貪官有罪，政府文件點都係歷史嘅組成部分，歷史點可以隨便被失蹤嘅呢？古語有云，孔子作《春秋》，而亂臣賊子懼，講嘅就係歷史嘅阻嚇作用。
總而言之，不容文件銷毀，莫讓貪曾逍遙，捍衞廉潔奉公嘅核心價值要從保護政府文件開始！