弊傢伙，港鐵幕門竟然着咗火！
尋日早上十點二十分左右喎，港鐵北角站三號月台忽然之間冒煙起火，月台緊急疏散三百名乘客，上演咗一幕人心惶惶大逃亡。到底發生乜嘢事呢？原來懷疑起火嘅係幕門嘅控制組件，○二年將軍澳線通車嘅時候已經啟用o架嘞。車站控制室收到煙霧感應器發出訊號之後立即通知車務控制中心報警，並且發出「嚴重事故」嘅警告。當時埋站列車同月台上有超過三百人，部分人見到煙霧瀰漫當堂嚇到驚惶失措，裙拉褲甩冇鞋挽屐走。好彩咋，田雞過河各有各撐嘅疏散過程有驚無險，冇傷冇亡咁先至叫做不幸中之大幸。
消防員十萬火急接報到場，見到起火源頭燒到通紅發光，動用幾十支滅火筒先至救得熄。消防以及港鐵人員懷疑幕門裝置短路出事，不過具體原因要兩個星期調查先至知道結果。
當然啦，乘客最關心嘅除咗自己條命仔會唔會火燒後欄之外，就係列車服務有冇受到嚴重影響。好衰唔衰，答案係有，列車服務受到非常嚴重嘅影響。一來車站封閉三小時，二來港島線列車於北角飛站，三來將軍澳線過海服務中斷，四來咯喎，港鐵竟然慢條斯理冇安排接駁巴士。調景嶺站就有大批乘客滯留，其中有人鼓譟，不滿行程受阻，前往港島有必要兜一個大圈先至能夠上路。難怪民間監管公共事業聯委會發言人蔡耀昌批評，港鐵應變手法極差。
其實講真吖，港鐵出事嘅經驗真係好鬼死豐富o架喇，因乜事幹應變手法仍然係咁差嘅呢？人哋久病都成醫啦，港鐵唔係呢度故障就係嗰度出事，點解唔可以吸取教訓為乘客提供「五星級災難應變服務」呢？即使笨到好似Ngon Ping Sam Luk Ling咁吖，由於周不時將乘客半天吊，所以都識得準備救生物資以免吊吊揈嘅時候一無所有。
嗱，蔡耀昌講得啱呀，港鐵淨係識得年年加價，之但係每次出現嚴重故障嘅時候應變措施都好差，過去曾經承諾嘅改善一直冇落實，令市民更加不滿。
成日都話港鐵有一套可加可減機制，如果票價同服務水平掛鈎，莫講話唔應該年年加價，反而要年年減價就真。喂，乘客搭港鐵就係貪佢唔使受到路面塞車之苦啫，點不知一時又話跪低，一時又話延誤，今次火警大逃亡更加搞到過海要兜一大段路，你話係咪離譜吖！
其實功夫茶都講到口水乾o架嘞，不妨再講多一次，特區政府身為港鐵大股東，唔該負起本身嘅責任，好好教訓港鐵高層，督促改善服務啦，唔係點叫做急民之所急呀！