功夫茶其實幾鍾意搭巴士，因為唔似得搭港鐵鑽地窿不見天日，搭巴士可以順便睇睇沿途嘅風光。如果唔係繁忙時間仲正，人少少有位坐，唔使摩肩接踵同人逼餐飽。
之但係可惜吖，搭巴士始終有一個比較頭痛嘅問題，大家有冇試過等來等去都等唔到巴士吖？若然你諸事不順時運低，去到巴士站通常都係送車尾，咁你就要傻傻更更癡癡地等。
等唔到巴士最主要嘅原因當然係脫班誤點啦，有人做過調查，巴士班次有四分之一誤點，誤點時間最長超過十分鐘。工聯會抽查全港六十六條巴士線，涉及五百一十八班巴士，發現有一百二十七班車未有按巴士公司訂明嘅班次時間到站，誤點比率兩成半，誤點時間由一分鐘至十幾分鐘不等。其中最嚴重嘅係港島區，誤點班次接近三成，九龍同新界西大約係兩成三至兩成半。
於是乎工聯會就建議嘞，申訴專員公署應該盡快完成有關巴士脫班嘅調查報告，政府亦應該嚴格控制私家車增長數目，以及巴士公司喺不影響服務情況之下重組路線。
喂，四分之一巴士班次出現誤點情況，你都咪話唔影響深遠喎。你知啦，港男港女好多都係有必要日日搭巴士返工嘅上班一族，萬一巴士唔生性誤點搞到遲到，激到老闆生蝦咁跳點算呀？今時今日一職難求，老闆激氣即係員工當殃，因為遲到而飯碗不保就該煨啦！
署理運輸及房屋局局長邱誠武出席公開場合被記者問到巴士脫班，佢話喎，運輸署曾經發信提醒相關巴士公司注意脫班問題。邱誠武仲話，巴士脫班問題改善咗，但未達到最理想情況，相信巴士公司的確喺人手同班次方面應作出改善。
唉，官腔即係官腔，講咗等於冇講。有改善，未理想，咁即係點呀？好心逗得幾百萬年薪嘅官老爺切切實實做好監管工作啦，嚴肅要求巴士公司依時依候不得誤點。
其實講真吖，如果將香港比喻為一架巴士，呢一架巴士都幾混帳，回歸十五年以來蹉跎歲月等於誤點誤到離晒大譜。更加弊傢伙嘅係，香港號巴士經常死火，唔跪低嗰時又進退失據，前進三公里又後退兩公里，唔知幾時先至可以埋站。前朝曾蔭權政府誤己誤人都唔在講啦，當今梁朝振英衙門都唔係好得幾多o架咋，每推出一項政策例必被喝令撤回，你真係唔知好嬲定好笑。
總而言之，巴士切勿誤點，官僚不容誤港，一方面固然要好好監管巴士公司準時運作，另一方面就係要針對貪曾遺禍撥亂反正。即係咁，香港號巴士千祈唔好撞到一塌糊塗呀！