醜媳婦終須要見家翁，再過十日，梁振英就要發表其首份施政報告，係龍係蛇，到時自有分曉。嗱，咪話功夫茶潑冷水吖，大家最好以平常心對待，千祈唔好有太大期望，否則，希望愈大，失望愈大嘅咋。
施政報告有乜嘢內容，暫時不得而知，但據講房屋問題會有較多着墨喎。即係咁，港府聲稱房屋問題係施政嘅重中之重，施政報告喺呢方面着墨多啲都好正常嘅，問題係咁又點呢？如果諗唔到具體辦法解決，純粹紙上談兵，咪又係嘥氣！
呢嗱，長遠房屋策略督導委員會尋日開會討論未來房屋需求，委員七嘴八舌，意見多多，但究竟得出乜嘢結論，根本冇人講得出。有委員話喎，督導委員會啱啱開始工作，未必可以好快扭轉建屋指標。其實計功夫茶話齋，喺依家嘅社會及政治氣氛下，港府寸步難行，就算有心而且有計扭轉建屋指標，都未必有能力喇。
係人都知，要解決房屋問題，就要增加供應，而要增加供應，就需要大量土地，咁土地又從何而來呢？喺維港以外填海，畀人批評破壞環保；發展新界東北，又畀人話「割地賣港」。無計可施之下，有人居然打啟德體育城及大學用地嘅主意，搞到滿城風雨。弱勢政府動輒得咎，要解決房屋問題，簡直難過登天。有反對派政客仲大講風涼話，要求政府盡快搵地建屋喎。唉，神又係佢哋，鬼又係佢哋，呢班政客乜都反對，有破壞冇建設，叫政府去邊度搵地至得o架！
講嚟講去，都係前朝曾蔭權政府靠害。貪曾任內一事無成唔在講，連長遠房屋策略都十五年冇檢討過，你話係咪離晒大譜吖。正如有人話齋，十年人事幾番新，何況十五年，依家嘅人口結構同以前已經唔同晒，除咗有唔少內地及外國人喺本港求學同工作，又有投資移民同優才計劃吸引外來人口，加上估計十七萬名雙非兒童之中有一半日後可能會來港生活，房屋需求不斷增加，而貪曾政府就乜都冇做過，連復建居屋都要臨下台至肯落實，你話喇，房屋問題點可能唔亂象叢生吖！
古人話齋，凡事豫則立，不豫則廢。房屋問題積重難返，「高地價、高樓價、高租值」三高長期困擾香港，就算梁振英政府頻頻出招，都係無補於事。「民生無小事」，房屋問題更加唔係小事，目前公屋輪候冊申請宗數已超過二十一萬，無殼蝸牛望樓興嘆，劏房、籠屋、棺材房遍地開花，如果施政報告再提唔出有效措施，市民固然失望，港府日子亦唔會好過嘅咋！